VIII AEF-da 2050 jyldyń álemdik ekonomıkalyq kartasy jáne Jibek jolyn jańǵyrtý talqylanady - Á.Erǵalıev
ASTANA. QazAqparat - VIII Astana ekonomıkalyq forýmynyń konferentsııalary men sessııalarynda álem ekonomıkasyn damytý, Uly Jibek jolyn jańǵyrtý jáne 2050 jyldyń boljamaly ekonomıkalyq kartasy máseleleri talqylanady, dep málimdedi búgin «Ekonomıkalyq zertteýler ınstıtýty» AQ basqarma tóraǵasynyń birinshi orynbasary Áset Erǵalıev OKQ brıfınginde. Bul týraly primeminister.kz saıtynda habarlandy.
«AEF aıasyndaǵy joǵary deńgeıdegi konferentsııada álemdik ekonomıkanyń ózekti oqıǵalaryn, ekonomıkalyq, qarjy jáne monetarlyq ózgerister talqylanady. Ekonomıkalyq ósimniń jańa draıverleri anyqtalyp, keler eki jylǵa arnalǵan álem ekonomıkasyn damytýdyń boljamdary men nusqalary qarastyrylady», - dedi Á.Erǵalıev. Sondaı-aq, onyń aıtýynsha, AEF alańynda ótetin ınvestıtsııalyq forýmda sheteldik ınvestorlarǵa Qazaqstannyń ınvestıtsııalyq klımaty men yntalandyrýdyń jańa paketi tanystyrylady. Sonymen qatar, spıkerler Qazaqstannyń ındýstrıaldy-ınnovatsııalyq damýyna tikeleı sheteldik ınvestıtsııalardy tartý múmkindikterin qarastyrady. «Birneshe sessııa Uly Jibek jolyn jańǵyrtý taqyrybyna arnalady. Ózara tıimdi saýda-ekonomıkalyq yntymaqtastyqty damytý joldary men ekonomıkalyq áleýet qaralady», - dep túsindirdi ınstıtýt basshysynyń orynbasary. Budan ózge, AEF aıasynda ýrbandalý forýmy qalalardyń ekonomıkalyq turaqtylyǵy men olardy josparlaý máselelerin talqyǵa salatyn sarapshylardy jınaıdy. Onda Smart City mysalyndaǵy qalany basqarýdaǵy ınnovatsııalyq kózqaras talqylanady. «Bolashaqqa baǵdar. 21 ǵasyrdyń álemdik ekonomıkasy» sessııasy josparlanǵan. Onda 2050 jyldyń ınteraktıvti álem kartasy, ǵalamdyq ekonomıka tendentsııalary talqylanady», - dep tolyqtyrdy Á.Erǵalıev.
Ol bıylǵy jyly AEF-na jahandyq ekonomıkalyq qoǵamdastyqtyń birqatar belgili sarapshysy qatysady dep josparlanǵanyn aıtyp ótti. Atap aıtqanda, Garvard ýnıversıtetiniń professory, amerıkalyq ekonomıst Kennet Rogoff, aty álemge áıgili ekonomıst Nýrıel Rýbını, «Forbs» iskerlik aptalyǵynyń bas redaktory, amerıkalyq bıznesmen, saıasatker Stıv Forbs shaqyrylǵan. VIII Astana ekonomıkalyq forýmy 2015 jyldyń 21-22 mamyrynda ótedi. 30 mańyzdy sessııa ótedi dep josparlanǵan, olar ekonomıkanyń basym baǵyty retinde ınfraqurylymdy damytý taqyrybyna shoǵyrlanǵan. Forýmǵa 90 elden 3000-nan astam delegat keledi dep josparlanǵan. 200-den astam vıp-spıkerler keledi dep kútilýde, olar -Úkimet, halyqaralyq uıymdar, úkimettik emes uıymdar ókilderi, Nobel syılyǵynyń laýreattary.
