VII «SAMGAU» halyqaralyq festıvaline 15 teatr qatysady
NUR-SULTAN. QazAqparat - 10-16 maýsym aralyǵynda Nur-Sultan qalasynda VII «SAMGAU» halyqaralyq teatr óneri festıval ótedi. Shara jyl saıyn Nur-Sultan qalasy ákimdiginiń qoldaýymen uıymdastyrylady jáne Elorda kúnine arnalǵan merekelik sharalar legin bastaıdy.
«SAMGAU» teatr festıvali elordalyq óner súıer qaýym taǵatsyz kútetin sharalardyń biri. Festıvalde elimizdiń jáne taıaý sheteldiń aıtýly teatr ujymdary bas qosady. Shara qonaqtary ózderiniń úzdik týyndylaryn «Jastar» teatrynyń, Qazaq drama teatrynyń jáne Nomad City Hall komedııa teatrynyń sahnalarynda qoıady.
Bıyl teatr óneri aptalyǵynda 15 ujym óz ónerlerin ortaǵa salmaq, onyń ishinde beseýi elordalyq: «Jastar» teatry, M.Gorkıı atyndaǵy Memlekettik akademııalyq orys drama teatry, Q.Qýanyshbaev atyndaǵy memlekettik akademııalyq mýzykalyq drama teatry, «Nomad City Hall» komedııa teatry men QR eńbek sińirgen qaıratkeri Nurken Óteýilovtiń teatry «SAMGAU» festıvaline alǵash ret úles qospaq.
Sonymen qatar, halyqaralyq shara barysynda Qazaqstannan N.Pogodın atyndaǵy Soltústik Qazaqstan drama teatry (Petropavl), «Jańa ǵasyr» teatry (Almaty q.), J. Aımaýytov atyndaǵy Pavlodar oblystyq qazaq mýzykalyq drama teatry (Pavlodar q.), S.Seıfýllın atyndaǵy oblystyq qazaq drama teatry (Qaraǵandy q.), Shyǵys Qazaqstan oblysynyń drama teatry (Óskemen) shaqyryldy. Al, sheteldik qatysýshylardyń arasynda Ózbekstan memlekettik drama teatry (Tashkent q.), «Ý Mosta» Perm teatry (Reseı, Perm q.), Jańa kórkem teatry (Reseı, Chelıabi), «Pilies» teatry (Lıtva, Klaıpeda q.), B. Kydykeeva atyndaǵy Qyrǵyz Memlekettik jas kórermen teatry (Qyrǵyzstan, Bishkek q.) bar.
VII «SAMGAU» halyqaralyq teatr óneri festıvali aıasynda spektakl kórsetilimderinen basqa, sahna maıtalmandary akterlik sheberlik pen rejıssýradan sheberlik dáristerin ótkizedi. Festıval boıynsha tolyq aqparat Nur-Sultan qalasynyń mádenıet jáne sport basqarmasynyń saıtynda usynylǵan.
