VII qysqy Azııa oıyndarynyń bılettik-ótkizý júıesi belgili boldy
ALMATY. 22 jeltoqsan. QazAqparat /Erbol Turymbetov/ - Búgin Qazaqstan baspasóz klýbynda 2011 jylǵy qysqy Azııa oıyndarynyń bılettik-ótkizý júıesine arnalǵan baspasóz máslıhaty boldy.
Onda Aq Azıada bıletiniń úlgisi kórsetildi.
«2010 jylǵy VII qysqy Azııa oıyndaryn uıymdastyrý komıtetiniń atqarýshy dırektsııasy» AQ-nyń Bılettik júıe basqarmasynyń bastyǵy Másimjan Taıpov qazirgi ýaqytta 350 myń dana bılet basylyp, qoldanysqa daıyn turǵanyn málim etti. «Bıletterdiń kóshirmesin jasaý múmkin emes. Bılet betindegi jyltyr jolaq pen arnaıy qara belgi joǵary tehnologııanyń kómegimen ǵana jasalady. Ol úshin arnaıy 72 prınter jumys isteıdi», - dedi ol.
Onyń aıtýynsha, bıletterdi oıdaǵydaı taratý jáne satý jobasyn júzege asyrý úshin Oıyndardyń biryńǵaı baqylaý-ótkizý júıesi qurylǵan.
«Bul bıletterdi onlaın arqyly da alýǵa múmkindik beredi. Jalpy, Astana men Almaty qalalarynyń bıletteri bir-birine uqsamaıdy. Bıletter Almatyda - 11, Astanada 9 kassada, sondaı-aq qosymsha jáne oıyn ótetin oryndardaǵy kassalarda satylatyn bolady», - dedi M. Taıpov.
Sonymen qatar, Azıadanyń ashylýy sekildi iri sharalar bastalarǵa 3 saǵat qalǵanda sol jerdegi bılet satý kassasy jumysyn toqtatatyny aıtyldy. Uıymdastyrý komıteti ókilderi bul qaýipsizdik maqsatynda jasalyp otyrǵan shara ekendigin jetkizdi.
Jalpy, Aq Azıadanyń saltanatty ashylý rásimi bıletteriniń quny 7500 teńge men 15000 teńge aralyǵynda bolsa, jabylý saltanatyna arnalǵan bıletterdiń baǵasy - 4500 teńge men 12000 teńge aralyǵynda bolmaq. Al jarystar bıletteriniń ortasha quny - 750-4500 teńge aralyǵynda.
