VII Halyqaralyq Jáýtikov olımpıadasynyń Bas júldesin Máskeý memlekettik ýnıversıtetiniń Arnaıy ǵylymı-oqý ortalyǵynyń komandasy jeńip aldy
ATY. 19 qańtar. QazAqparat /Názıra Eleýhan/ - Búgin Almatyda «Daryn» Respýblıkalyq ǵylymı-tájirıbelik ortalyǵy men O.Jáýtikov atyndaǵy Respýblıkalyq mamandandyrylǵan daryndy balalarǵa arnalǵan fızıka-matematıka orta mektep-ınternatynyń birikken jobasy matematıka, fızıka jáne ınformatıkadan dástúrli VII Halyqaralyq Jáýtikov olımpıadasy óz máresine jetti.
Ótken senbi kúni bastalǵan olımpıadanyń jeńimpazdary anyqtalyp, jabylý rásiminde olar saltanatty túrde marapattaldy.
Olımpıadaǵa álemniń 14 elinen 46 komanda, 296 úmitker qatysqan bolatyn. Olardyń bilimin ál-Farabı atyndaǵy QazUÝ rektory Ǵalymqaıyr Mutanov pen QR UǴA akademıgi Asqar Jumadildaev bastaǵan ádilqazylar tarazylady.
Saltanatty rásimde atalmysh sharanyń uıymdastyrýshylary sóz sóılep, jeńimpazdardy quttyqtady. "Dástúrli VII Halyqaralyq Jáýtikov olımpıadasy óz máresine jetti. Bilim saıysynda "júzden júırik, myńnan tulpar" shyqqan daryndardy shyn júrekten quttyqtaımyz",-dedi «Daryn» RǴPO dırektory Dildash Bıtýova. Ol quttyqtaý sózinde Bilim mınıstrligi balalardyń bilimderin shyńdaıtyn is-sharalarǵa, olımpıadalar men ár túrli ǵylymı jarystardy uıymdastyrýǵa qoldaý bildirýmen qatar, onyń sanyn arttyryp, úlken nazar aýdaryp keledi dep atap ótti.
Dildash Bıtýova sonymen qatar, Ómirbek Joldasbekovtyń 80 jyldyǵyn toılaý aıasynda bıylǵy jyldyń 1 naýryzynda "Jibek joly" olımpıadasy ótetinin habarlady jáne barlyq oqýshylardy olımpıadaǵa qatysýǵa shaqyrdy.
QR UǴA akademıgi, ádil qazylar alqasynyń tóraǵasy Asqar Jumadildaevtyń aıtýynsha, olımpıadanyń deńgeıi jyldan jylǵa artyp keledi. "Bıylǵy olımpıadanyń erekshelegi - jeńimpazdyń tuńǵysh ret qyz bala bolǵandyǵy. Ol - máskeýlik Vıktorııa Malıazova", - dep atap ótti akademık.
Sonymen, bıylǵy jyldyń bilim básekesinde komandalyq esepte Bas júldeni Máskeý memlekettik ýnıversıtetiniń Arnaıy ǵylymı-oqý ortalyǵynyń (Reseı, Máskeý q.) komandasy jeńip aldy. 1-oryndy Býharest qalasynyń TUDOR VIANU National High School of computer science komandasy (Rýmynııa, Býharest q.) ıelendi, júldeli 2-oryndy O.Jáýtikov atyndaǵy Respýblıkalyq mamandandyrylǵan daryndy balalarǵa arnalǵan fızıka-matematıka orta mektep-ınternaty (RMFMOMI. Qazaqstan, Almaty q.) men Sofııa joǵary mektebiniń (Bolgarııa, Sofııa q.) komandalary ózara bólisse, 3-oryndy Fatıh kolledji, Túrik joǵary mektebi (Túrkııa, Ankara q.) jáne Tájik- túrik lıtseıiniń (Tájikstan, Dýshanbe q.) komandalary ıemdendi.
Bilim básekesinde 24 olımpıadashy altyn medal (Qazaqstannyń enshisinde 7 medal, onyń 4- eýi RMFMOMI-ge tıesili), 47 olımpıadashy kúmis medal (Qazaqstannyń enshisinde 14 medal, onyń 5-eýi RMFMOMI-ge tıesili), 62 olımpıadashy qola medal (Qazaqstannyń enshisinde 24 medal, onyń 7- eýi RMFMOMI-ge tıesili) ıelendi. Barlyǵy 133 medaldan Qazaqstannyń olımpıadashylaryna 45 medal buıyrsa, onyń 16-syn Jáýtikov atyndaǵy Respýblıkalyq mamandandyrylǵan daryndy balalarǵa arnalǵan fızıka-matematıka orta mektep -ınternatynyń oqýshylary (RMFMOMI) aldy.
Olımpıada qorytyndysy boıynsha anyqtalǵan eń úzdik 7 komandaǵa olımpıadanyń bas seriktesi «RMFMOMI túlekteriniń qory» Qoǵamdyq qory jáne bas demeýshileri «ExxonMobil Kazakhstan Inc.», «Microsoft Kazakhstan», «Kcell» kompanııalarynyń atynan baǵaly syılyqtar (jeńimpaz komandanyń árbir múshesine 1-oryn úshin - beınekamera, 2-oryn úshin - sandy fotoapparat, 3-oryn úshin - uıaly telefon) usynyldy. Bas júldeni jeńip alǵan komandanyń 7 qatysýshysyna noýtbýk tartý etildi.
