VII halyqaralyq retro-rallıine qatysýshylar Aqmola oblysynda boldy
KÓKShETAÝ. QazAqparat - VII halyqaralyq «Beıjiń-Parıj» retro-rallıne qatysýshylar Aqmola oblysynda boldy, dep habarlaıdy QazAqparat tilshisi.
Aqmola oblysynyń «Visit Aqmola» týrıstik aqparattyq ortalyǵynyń málimetinshe, dástúrli, bedeldi VII halyqaralyq «Beıjiń-Parıj» retro-rallıi bıylǵy jyly Qazaqstan aýmaǵynan ótýde. Oǵan qatysýshylar Nur-Sultan qalasy, Býrabaı men Sandyqtaý kentterinde boldy. Budan ári jol boıynda Balkashıno aýylyna soqty.
Retro kólikterden quralǵan «Beıjiń-Parıj» halyqaralyq rallıine álemniń ár elinen kóptegen kórermen jınalady. Avtosherýge 30 memleketten 120 rarıtetti ekıpaj qatysady. Marafon maýsymnyń 2-de Qytaı eliniń astanasynda bastaý alyp, shildeniń 7-de Parıjde máresine jetedi. Osy aralyqta avto marofonǵa qatysýshylar 12 memleketti basyp ótip, 14 994 shaqyrymdy artqa tastaıdy. Qazir rallı qatysýshylary Qytaı, Mońǵolııa, Kazaqstan aýmaǵynan júrip ótti. Alda Fınlıandııa, Estonııa, Latvııa, Polsha, Germanııa, Belgııa jáne Frantsııa elderi bar.
««Beıjiń - Parıj» rallıi naǵyz tórt dóńgelektegi murajaı. Mundaǵy eń sońǵy shyqqan avtokólikti 1974 jyly qurastyrylǵan. Eń kónesi - 1915 jylǵy. «Ford», «Bentlı», «Mersedes», «Rolls-Roıs», «Shevrole» jáne «Porshe» sııaqty avtomobılderge de 100 jyl bolǵan», - dep málim etti Aqmola oblysynyń «Visit Aqmola» týrıstik aqparattyq ortalyǵynan.
