VII Dúnıejúzilik kóshpendiler oıyndary ótetin el jaqyn arada jarııalanady
ASTANA. KAZINFORM — Dúnıejúzilik kóshpendiler oıyndarynyń VII kezeńi ótetin el 1–2 aı ishinde anyqtalmaq, dep habarlady Kabar.
Bul týraly Qyrǵyzstannyń Bırınchı radıosynda tikeleı efırde Dúnıejúzilik kóshpendiler oıyndary hatshylyǵynyń basshysy Nursultan Ádenov aıtty.
Onyń sózinshe, VII oıyndar basqa elde ótkiziledi. Qazirgi kezde 3–4 memleket oıyndardy óz aýmaǵynda ótkizýge nıet bildirip otyrǵan kórinedi.
— VI Dúnıejúzilik kóshpendiler oıyndarynyń bastalýyna bes aı qaldy. 2025 jyly biz álemniń 100 eline shaqyrý joldadyq. Qazirge deıin shamamen 50 memleket resmı túrde qatysýyn rastady. Jalpy alǵanda 90-nan astam eldiń delegatsııasyn qabyldaımyz dep otyrmyz. Uıymdastyrý komıteti fınaldyq daıyndyq kezeńine ótti. Kún jylyǵan kezde biz jóndeý jáne ınfraqurylymdyq jumystardy bastaımyz. Dástúr boıynsha oıyndardyń «júregi» sanalatyn Qyrchyn shatqalynda etnofestıval uıymdastyrylady. Etnokólip kontseptsııasy tolyq jańartylyp, komıtet tarapynan bekitildi. Qazir rejısserlik top, sáýletshiler men qurylysshylar daıyndyq jumystaryn júrgizip jatyr jáne aýa raıy múmkindik bergende montajǵa kirisedi. Etnoqalashyqtyń resmı ashylýy 2 qyrkúıekke josparlanǵan, — dedi Nursultan Ádenov.
Sonymen qatar, VI oıyndar úshin jańa oryndar paıdalanylmaıdy, barlyq qajetti ınfraqurylym tolyq daıyn ekeni aıtyldy.
— VI Dúnıejúzilik kóshpendiler oıyndary úshin jańa lokatsııalar paıdalanylmaıdy. Ystyqkól oblysyndaǵy qoldanystaǵy ınfraqurylym tolyq daıyn, sondyqtan biz tek tekserilgen alańdardy qoldanýdy sheshtik. Mysaly, Cholpon-Ata qalasyndaǵy ıppodrom, «Gazprom» FOK, «Rýh Ordo» mádenı ortalyǵy jáne Bosterı aýylyndaǵy «Nomad» amfıteatry qoldanylady, — dep naqtylady ol.
Sonymen qatar, Cholpon-Atadaǵy ıppodromǵa jeńil jelpi jóndeý jumystary ǵana josparlanyp otyr.
Budan buryn Qyrǵyzstanda ótetin kóshpendiler oıyny tizimine qazaqtyń kókpary engenin jazǵanbyz.
