VII Dúnıejúzilik kóshpendiler oıyndary 2028 jyly Tatarstanda ótedi
BІShKEK. KAZINFORM - VII Dúnıejúzilik kóshpendiler oıyndary 2028 jyly Reseıdiń Tatarstan Respýblıkasynda ótedi. Bul týraly Qyrǵyzstan Prezıdenti Sadyr Japarov Bishkekte ótip jatqan VI Dúnıejúzilik kóshpendiler oıyndarynyń ashylý saltanatynda málimdedi. Bul týraly Kazinform agenttiginiń menshikti tilshisi habarlaıdy.
Sadyr Japarov óz sózinde Reseıden 2028 jyly VII Dúnıejúzilik kóshpendiler oıyndaryn Tatarstanda ótkizýge daıyn ekeni týraly resmı hat kelgenin aıtty.
-Bul bastamasy úshin Reseı Prezıdenti Vladımır Vladımırovıch Pýtınge alǵysymdy bildiremin. Qyrǵyzstan bul halyqaralyq sharany joǵary deńgeıde ótkizý úshin Reseı tarapyna jan-jaqty qoldaý kórsetýge daıyn, – dedi Qyrǵyzstan Prezıdenti.
Eske salaıyq, Qyrǵyzstan astanasyndaǵy jańa «Bishkek Arena» stadıonynda VI Dúnıejúzilik kóshpendiler oıyndarynyń ashylý saltanaty ótip jatyr.
Oǵan Qazaqstan Prezıdenti Qasym-Jomart Toqaev bastaǵan memleket basshylary jáne Shanhaı yntymaqtastyq uıymynyń sammıtine qatysý úshin kelgen birqatar halyqaralyq uıymdardyń jetekshileri qatysýda.
Qazaqstannan 150-den astam sportshy VI Dúnıejúzilik kóshpendiler oıyndarynda sporttyń 20 túrinen baq synaıdy.
