Vietjet Air áýe kompanııasy Qazaq Air-dyń 38 mlrd teńge qaryzyn japty
ASTANA. KAZINFORM – Kólik mınıstri Marat Qarabaev Qazaq Air áýe kompanııasyn sheteldik ınvestorǵa satýdyń sebepteri men oń tustaryn atady.
«Vietjet Air kompanııasy qazirdiń ózinde 184 bortqa ıe jáne bul kompanııanyń birneshe mindeti bar. Birinshi, «Qazaq Air» kompanııasynyń 38 mlrd teńge somasyndaǵy qaryzy tolyǵymen jabyldy. Ekinshi, Qazaqstanda tirkeletin qosymsha 20 áýe reısin iske qosady, tutastaı alǵanda kompanııa Qazaqstan aýmaǵynda 50 áýe bortyna jetkizýdi josparlap otyr. Bul degenimiz 5 jyl ishinde Qazaqstanda qosymsha jańa 50 bort keledi jáne ınvestıtsııa somasy 5 mlrd teńgeden kem bolmaıdy. Salystyrsaq, naryqta 23 jyl boıy jumys istep kele jatqan «Eır Astana» áýe kompanııasynyń 50 áýe borty bar», - dedi Májilistiń alańynda BAQ ókilderiniń saýalyna jaýap bergen Marat Qarabaev.
Onyń aıtýynsha, vetnamdyq «VietJet Air» áýe kompanııasy elimizde qosymsha 4 myń jańa jumys ornyn ashady.
«Sol sııaqty el ishinde ǵana emes, halyqaralyq reıster de bolady. Sonymen qatar biz kompanııamen, ınvestormen áýejaılardy usyný týraly máseleni talqylaımyz. Áýe borty 50-ge deıin ulǵaıady desek, olardy ornalastyratyn áýejaı bolýy kerek. Biz birneshe áýejaıdy qosymsha ınvestıtsııalar salynatyn sharttarmen senimgerlik basqarýdy berý máselesin qolǵa almaqpyz. VietJet Air kompanııasy áýejaıǵa negizdelgen hab ǵana emes, ony Qazaqstanǵa júkterdi jetkizý jáne onyń ishinde Qazaqstan aýmaǵynda basqa elderden júkterdi jınaý ortalyǵy retinde paıdalanýdy jáne odan ári ony Qazaqstannan tys jerde tasymaldaý jaǵynda qarastyramyz. Kompanııa Túrkistan, Qyzylorda, Shyǵys Qazaqstan oblysyndaǵy jáne basqa áýejaılarǵa qyzyǵýshylyq tanytýda. Bul bizdiń kelissózder ustanymymyz, sońǵy sheshim qosymsha habarlanady», - deıdi ol.
