Vıdeokameraǵa eńbektep jetken: Elordada aıyrbastaý pýnktinen 12 mln urlandy
NUR-SULTAN. QazAqparat – Elordada 37 jastaǵy azamat aldyn ala daıyndalǵan stsenarıı boıynsha valıýta aıyrbastaý pýnktinen 12 mln teńge urlady, dep habarlaıdy QazAqparat tilshisi.
«Nur-Sultan qalalyq Polıtsııa departamentiniń krımınaldyq polıtsııa qyzmetkerleri valıýta aıyrbastaý pýnktine urlyqqa túsken elordanyń buǵan deıin sotty bolǵan 37 jastaǵy turǵynyn izin sýytpaı ustady», - delingen departament aqparatynda.
Polıtsıeılerdiń málimetine qaraǵanda, ol urlyqqa tyńǵylyqty daıyndyqpen barǵan. Dittegen oıyn júzege asyrý úshin óz kóliginiń memlekettik tirkeý nómirin buǵan deıin urlap alǵan basqa nómirmen aýystyrǵan. Sodan keıin bet-júzin tumshalap, dúken men aıyrbastaý pýnkti ornalasqan ǵımaratqa kóshe jaq betindegi esiginiń qulpyn buzý arqyly kirgen. Qozǵalys datchıkterin isten shyǵarý úshin olar ornalasqan jerge deıin eńbektep jetken. Beınebaqylaý kamerasynyń obektıvin jaýyp qoıǵannan keıin ol aıyrbastaý pýnktine esh kedergisiz kirgen.
«Seıfti buzyp, ishinen jalpy somasy 12 mln teńge bolatyn ártúrli valıýtalardy urlap ketken. Degenmen, saqtyqtyń barlyq sharalaryn qoldanǵanymen, oıy júzege aspady. Іz kesýshilerdiń tynymsyz jumystarynyń nátıjesinde qaskóı izi sýymaı qolǵa tústi. Ol urlanǵan qarajattyń jartysyn jumsap úlgergen eken. Ustalǵan azamat tutqyndalyp, Nur-Sultan qalalyq PD ýaqytsha oqshaýlaǵyshyna qamaldy. QR QK 188-baby boıynsha sotqa deıingi tergeý júrgizilip jatyr. Elorda aýmaǵynda jasalǵan dál osyndaı qylmystarǵa qatysy tekserilýde», - dep atap ótedi vedomstvodan.
