Vıdeobloger «Samuryq Qazynaǵa» qalaı jumysqa turýǵa bolatynyn kórsetti
ALMATY. QazAqparat - Vıdeobloger, APEX Consult baqylaý keńesiniń tóraǵasy, Shymkent ákiminiń shtattan tys keńesshisi Danat Jýmın «Samuryq Qazyna» quramyna qalaı jumysqa kirýge bolatyndyǵyn kórsetti, dep habarlaıdy QazAqparat tilshisi.
Bloger ulttyq ál aýqat qorynyń eksperttik-keńestik jıynyna qatysqan.
Danat Jýmın «Samuryq Qazyna» AQ HR basqarma dırektory Ulan Tájibaevtan: «Kókelerdiń» kómegimen jumysqa turýǵa bola ma?» dep suraǵan.
«2014 jyldan beri «Samuryqta» transformatsııa júrip jatyr. Qyzmetkerlerdiń jaqsy jumys jasaýyna motıvatsııa jasap, olardyń mansabynyń ósýine yqpal etemiz. Jumysynyń nátıjeliligin baǵalaımyz. Jumys tıimdiligin arttyrýǵa kómektesetin zamanaýı quraldarmen qamtamasyz etemiz», - dep jaýap bergen oǵan Ulan Tájibaev.
Onyń aıtýnysha, «Samuryq Qazyna» AQ-ǵa kez kelgen adam jumysqa tura alady.
Ol úshin adam óz múmkindigin ádil baǵalap, oǵan qoıylatyn talaptardy eskerýi tıis. Sonan soń onlaın rejimde ótinish bere alady.
NR mamany joǵarydan túsetin qońyraýlar týraly da aıtyp ketti.
«Mundaı qońyraýlarǵa jaýabym bar. Ol adamdar kelsin de, bizdiń testilerden ótip kórsin. Kompanııada baǵalaý júıesi bar. Óz isiniń sheberleri, bilimdi, aqyldy, eshkimge uqsamaıtyn adamdar testten qıyndyqsyz ótedi. Maǵan ol adamnyń qaıda bilim alǵany mańyzdy emes. Meniń túsinigimshe, adamdy joǵarydaǵylardyń talabymen alsam, ózimniń shtatyma protektsııaǵa tap bolatyn adamdy alýym múmkin. Basqalarmen teń dárejede joǵarydan túsken talap álgi úmitkerge mınýs bolady», - dedi ol.
Ulan Tájibaev 2006 jyly Qazaq ulttyq ýnıversıtetin halyqaralyq quqyq mamandyǵy boıynsha támamdaǵan. Buǵan deıin Ońtústik Qazaqstanda, Astanada túrli laýazymdy qyzmetterde jumys istep kelgen.
