Vıtse-spıker D.Nazarbaeva sheneýnikterge múgedekter arbasyna bir sát otyryp kórýdi usyndy
ASTANA. QazAqparat - Búgin Parlament Májilisindegi Úkimet saǵatynda vıtse-spıker Darıǵa Nazarbaeva sheneýnikterge múgedekter arbasyna bir sát otyryp kórýdi usyndy. Eske salaıyq, Úkimet saǵatynda múmkindigi shekteýli adamdardyń quqyǵyn qorǵaý máseleleri talqylanǵan bolatyn.
«Ózderińizdi bireýge muqtaj adamnyń keıpinde sezinip kóretin edińizder, sosyn sol arbamen qalany aralap, teatrǵa baryp, dúken aralap, kınoteatrǵa, medıtsınalyq mekemege baryp kórińizder. Sosyn keshke qaraı tyńdaıtyn edik, olarǵa jaqsy ma, jaman ba, yńǵaıly ma, yńǵaısyz ba? Meniń oıymsha, bul durys másele, osyndaı usynyspen atqarýshy bılikke shyqsaq qaıtedi?» - dedi D.Nazarbaeva. Onyń paıymynsha, bul sheneýnikterge múgedekter problemasyn jaqynyraq túsinýge, sezinýge septigin tıgizer edi.
Eske sala keteıik, Úkimet saǵaty barysynda depýtat Gúlnár Yqsanova
Astananyń ózinde múmkindigi shekteýli jandar úshin «kedergisiz» orta máselesi óz sheshimin tappaı otyrǵanyn aıtqan edi. «Basqasyn aıtpaıyq, tipti Astananyń ózinde múmkindigi shekteýli jandar úshin «kedergisiz» orta máselesi óz sheshimin tappaı otyr emes pe? Qazaqstan múgedekter konfederatsııasynyń sarapshylary elordanyń sol jaǵalaýyndaǵy adam eń kóp baratyn ǵımarattaryndaǵy pandýstardy synap kórgen eken. Nátıjesinde «Astana Opera» teatrynyń pandýsy ǵana arbaǵa tańylǵan múgedekter úshin yńǵaıly ekendigi anyqtaldy. Biz «EKSPO-2017» halyqaralyq kórmesin ótkizgeli otyrmyz. Halyqaralyq tájirıbege súıensek, kórmeni tamashalaýshylardyń 3-5 paıyzyn múmkindigi shekteýli týrıster quraıdy eken», - dedi G.Yqsanova.
