Vıtse-premerge Qaraǵandydaǵy jumysqa ornalastyrý máseleleri baıandaldy
QARAǴANDY. QazAqparat - QR Premer-Mınıstriniń orynbasary Berdibek Saparbaev Qaraǵandy oblysyna jumys sapary barysynda mobıldi Jumyspen qamtý ortalyqtarynyń tájirıbesimen tanysty, dep habarlaıdy QazAqparat tilshisi.
Qaraǵandy oblysy elimizde birinshi bolyp iri bazarlar men vokzaldar sekildi adam kóp shoǵyrlanatyn jerlerde jumysqa ornalastyrý pýnktterin qurdy. Jumys izdep júrgen adamdar vakansııalarmen tanysyp, birden jumys berýshige joldama ala alady nemese kásibı kýrstarǵa jazylýyna múmkindik bar. Mamandar óz isin ashý jáne memlekettik qoldaý sharalaryna qatysty keńes beredi.
Berdibek Saparbaev oblys ortalyǵynda alǵashqy bolyp ashylǵan mobıldi Jumyspen qamtý ortalyǵynda bolyp qaıtty. Atalmysh nysan kún saıyn myńdaǵan adam ótetin «Shyǵys» bazarynyń aýmaǵynda ornalasqan. Vıtse-premerdi ortalyq qyzmetiniń júıeliligi men tıimdiligi qyzyqtyrdy.
Osyndaı mobıldi ortalyqtar oblystyń basqa qalalary men aýdandarynda iske qosylǵan. Olardyń jalpy sany – 11. Sonymen qatar, 13 jyljymaly jumyspen qamtý pýnkti bar.
Aıta keteıik, bıyl óńirde 25 myńnan astam adam eńbekpen qamtyldy. Memlekettik Jumyspen qamtý baǵdarlamasynyń barlyq tetikteri iske qosyldy. Jastar tájirıbesine 2321 adam jiberildi. «Bıznes bastaý» jobasy boıynsha kásipkerlik negizderine 1300-den astam adam oqytyldy. Kýrs túlekteri jobalardy iske asyrýǵa 957 shaǵyn nesıe aldy.
Jyl basynan beri oblysta 30 700-den astam jańa jumys orny ashyldy, onyń ishinde árbir úshinshisi - turaqty.
Keıin QR Premer-Mınıstriniń orynbasary áleýmettik qorǵaý máseleleri boıynsha oblys ákimdiginde keńes ótkizdi.
