Vıtse-premer Jambyl oblysynda halyq tabysyn arttyrý baǵdarlamasynyń barysyn tekserdi

TARAZ. QazAqparat – QR Premer-Mınıstriniń orynbasary Eraly Toǵjanov «Halyqtyń tabysyn arttyrý baǵdarlamasynyń» iske asyrylý barysyn tekserý úshin Jambyl oblysyna bardy. QazAqparat bul týraly primeminister.kz saıtyna silteme jasap habarlaıdy.

Vıtse-Premer «Shamýratov Shovkat Valerevıch» Jeke kásipkerliginiń jumysymen tanysty. Shaǵyn kásiporyn kúnine 400 kg shujyq ónimderin shyǵarady. Tsehta 7 maman jumys isteıdi. Aýyl halqynyń tabysyn arttyrý (bıznes-jobalardy qoldaý) pılottyq jobasynyń 5 baǵyty boıynsha alynǵan nesıe somasy 10 000,0 myń teńgeni quraıdy.

Sondaı-aq Eraly Toǵjanov aýdany 80 sotyq jerdi alyp jatqan «Serik» JK jylyjaıyn aralap kórdi. Nesıe somasy – 14 566,0 myń teńge. Ótken jyly 30 tonna qııar óndirildi. Jylyjaıda tamshylatyp sýarý júıesi ornatylǵan. Onda 11 adam jumys isteıdi.

Vıtse-premer ilki jobany iske asyrýdyń joǵary mýltıplıkatıvtik tıimdiligine nazar aýdardy. Mal sharýashylyǵyn damytýdyń nátıjesinde shaǵyn tsehtar iske qosylyp, jańa jumys oryndary ashylýda.

«Halyqtyń tabysyn arttyrý baǵdarlamasynyń» negizgi maqsaty – qazaqstandyqtardyń turmys deńgeıin arttyrý. Ol úshin halyqty jumyspen qamtýdy retteý jónindegi júıeli sharalardy qabyldaý mańyzdy. Bul baǵytta aýyldaǵy dál osyndaı kásiporyndar úlken ról atqarady», — dedi Eraly Toǵjanov.

Baızaq aýdanynda pılottyq jobanyń 5 baǵyty boıynsha barlyǵy 6 bıznes-joba iske asyryldy. Olardyń biri – gıdropon qondyrǵysyn satyp alý.

Qazaqstandaǵy osy jabdyqtar men qondyrǵylardyń negizgi jetkizýshisi – Taraz qalasynda ornalasqan «Agro Green Technology» JShS.

E. Toǵjanov qýaty táýligine 400 kg jem shyǵarýǵa qaýqarly jyljymaly gıdropondy qondyrǵyda qurama jem óndirý protsesimen tanysty. Seriktestik sonymen qatar gıdroponıka ádisimen dárýmendelgen jasyl jem, kókónis, kúrish ósirýmen aınalysady.