Vıtse-premer Ómirzaq Shókeevtiń otstavka týraly ótinishine pikir bildirdi
NUR-SULTAN. QazAqparat – QR Premer-Mınıstriniń birinshi orynbasary Roman Sklıar Túrkistan oblysynyń ákimi Ómirzaq Shókeevtiń otstavka týraly ótinishine pikir bildirdi, dep habarlaıdy QazAqparat tilshisi.
«Ómirzaq Estaıuly tájirıbeli basshy, uzaq ýaqyt boıy memlekettik qyzmettiń túrli qurylymdaryn basqaryp keldi. Ony rasynda da mańyzdy saıası tulǵa dep ataýǵa bolady», - dedi Roman Sklıar Úkimet kýlýarynda tilshilerge bergen suhbatynda.
Vıtse-Premer Ómirzaq Shókeevtiń qabyldaǵan sheshimin óte durys jáne zańdy dep atady.
«Memlekettik qyzmet týraly zańda qaramaǵyndaǵy qyzmetkerdiń kinási dáleldengen jaǵdaıda tikeleı basshynyń otstavkaǵa ketý týraly ótinish beretini jazylǵan, ony joǵary turǵan basshy qabyldaıdy nemese keri qaıtarady. Sondyqtan Ómirzaq Shókeevtiń áreketi óte qısyndy jáne durys», - dedi Roman Sklıar.
Eske sala ketsek, keshe Túrkistan oblysynyń ákimi Ómirzaq Shókeev otstavkaǵa ótinish berdi.
Ortalyq kommýnıkatsııalar qyzmetinde ótken brıfıngide Ómirzaq Shókeev «Kentaý ákiminiń qylmysy dáleldense, otstavkaǵa ketýge daıynmyn» degen bolatyn.
23 aqpanda Kentaý qalasynyń ákimi asa iri kólemde para aldy degen kúdikke ilindi. Óziniń senimdi tulǵalary arqyly memlekettik-jekemenshik áriptestik aıasynda qaladaǵy avtokólik joldaryn jóndeýmen aınalysatyn seriktestik dırektorynan 98 500 AQSh dollaryn (42 mln 500 myń teńge) aldy degen aıyppen 10 jylǵa sottalǵan bolatyn. Aldyńǵy kúni Almaty qalalyq soty sottalýshynyń apellıatsııalyq shaǵymyn qarap, ony qanaǵattandyrmady.
