Vıtse-premer memlekettik satyp alýlar boıynsha jańa zań jobasyn ázirleýdi usyndy
ASTANA. QazAqparat - Búgin QR Qarjy mınıstrliginiń alqa májilisinde QR Premer-Mınıstriniń orynbasary, vedomstvo basshysy Baqyt Sultanov memlekettik satyp alýlar boıynsha komıtetti qurýdy usyndy.
«Biryńǵaı uıymdastyrýshy arqyly satyp alýlardy ortalyqtandyrý boıynsha jumystar júrgizilýde. Bizdiń tarapymyzdan tıisti komıtetti qurý týraly usynys jasaldy. 2015 jyldyń qańtarynan bastap osy tektes organdardy jergilikti deńgeıde qurý qarastyrylýda», - dedi mınıstr.
B.Sultanovtyń sózine qaraǵanda, birinshi kezekte bıýdjettik ınvestıtsııalyq jobalar ortalyqtandyrylady.
Sonymen qatar osy baǵytta zańnamany jetildirý máselesine toqtalǵan vedomstvo basshysy bul qujat bıýdjet qarjysyn únemdeýdi jáne satyp alýlardyń ashyqtyǵyn qamtamasyz etýi tıis ekendigin atap ótti.
«Sondyqtan da bıylǵy 1 shildege deıin memlekettik satyp alýlar boıynsha jańa zań jobasyn ázirleýdi Qarjy mınıstrligine tapsyrýdy usynamyz. Onda qazirgi zamanǵy halyqaralyq tájirıbe, ıaǵnı BUU-nyń tıptik jańa zańy, FIDIC standarttary, sondaı-aq ózimizdiń aqparattyq tehnologııalardy paıdalanýdyń jınaqtalǵan tájirıbesi jáne memlekettik satyp alýlardy ortalyqtandyrý baǵyttary eskerilýi tıis», - dedi mınıstr.
