Vıtse-premer Qazaqstanda stýdenttik týrızmdi damytýdy tapsyrdy
ASTANA. QazAqparat - QR Premer-Mınıstriniń orynbasary Darıǵa Nazarbaeva Qazaqstanda stýdenttik týrızmdi damytýdyń naqty sharalaryn jasaqtaýdy tapsyrdy.
«Stýdenttik týrızmdi damytý - óte jaqsy ıdeıa. Birlese otyryp, týrıstik marshrýttardy anyqtaýǵa bolady. Infraqurylymǵa búginde kóńil tolmaıdy. Bizde áli Túrkııa, Dýbaı nemese batys Eýropa elderindegideı emes», - dedi ol búgin Astanadaǵy Sáken Seıfýllın atyndaǵy Qazaq Agrotehnıkalyq ýnıversıtetine jasaǵan sapary kezinde.
Vıtse-premer týrıstik salanyń aldynda birqatar maqsat-mindetter turǵandyǵyn taǵy bir eske salyp ótti. Onyń bastysy - ishki týrızmniń úlesin arttyryp, jaqyn memleketterden týrısterdi kóptep tartý bolyp tabylady. D.Nazarbaevanyń aıtýynsha, týrıstik ınfraqurylymdy áleýeti joǵary jerlerde damytý qajet.
«Ony jasandy túrde salyp, keıin ol ınfraqurylymdar bos qalyp jatsa - bos áýreshilik bolady. Memleket týrızmniń áleýeti joǵary aýdandarǵa ǵana jol jáne qajetti kommýnıkatsııa qurylysyna jaýapty», - D. Nazarbaeva.
