Vıtse-premer Qaraǵandy oblysynyń jylý berý maýsymyna daıyndyǵyn tekserdi
Temirtaýda jylý kózderi men jylý jelilerin aýqymdy rekonstrýktsııalaý jumystary júrip jatyr. Qaraǵandy oblysyna jumys sapary barysynda QR Premer-Mınıstriniń birinshi orynbasary Roman Sklıar júrgizilip jatqan jumystardyń barysyn tekserdi.
«ArselorMıttal Temirtaý» AQ 2-JEO-synda jylý berý maýsymyna daıyndyq jáne jetinshi qazandyqtyń qurylysy týraly kásiporynnyń bas dırektory Vladımır ıAblonskıı baıandady. Onyń aıtýynsha, úsh qazandyq pen úsh týrbınaly generatordy jóndeý jumystary aıaqtalýǵa jaqyn. Sondaı-aq jetinshi qazandyqty salý boıynsha mańyzdy jobany iske asyrý keshiktirilýde: nysanda jumysshylar jetpeı jatyr, negizgi jabdyqtar keshigip ornatylýda.
Merdiger uıym basshylyǵynyń («AB Construction» JShS) esebin tyńdaǵan Roman Sklıar qurylys-montajdaý jumystaryn ýaqytyly aıaqtaý qajettigin belgilep, eskertý jasady.
Temirtaýda Roman Sklıarǵa jylý jelilerin jóndeý baǵdarlamasy usynyldy. Qalada jylý jelileriniń barlyq tozǵan ýchaskesi boıynsha rekonstrýktsııalaý júrip jatyr. Jumystar jylý berý maýsymy bastalǵanǵa deıin aıaqtalýǵa tıis.
Premer-mınıstrdiń birinshi orynbasary oblystyń basqa da birqatar energııa kózin aralady. Ol Topar, Shahtınsk jáne Qaraǵandyǵa bardy.
«Topar» MAES basshylyǵy negizgi jáne qosalqy jabdyqtardy kúrdeli jáne qalypty jóndeý jumystary keste boıynsha júrip jatqanyn habarlady.
«Búgingi tańda jóndeý baǵdarlamasy 60%-ǵa oryndaldy. Kózdelgen josparlardan artta emespiz. Barlyq mindettemelerdi oryndaımyz», — dedi «Topar» MAES operatsııalyq dırektory Aleksandr Býzo.
Shahtınsk JEO-synyń tozýy – 75% deńgeıinde. 10 jyl boıy jabdyqqa kúrdeli jóndeý júrgizilmegen. Bıyl úsh qazandyq pen eki týrbına jóndelip jatyr. Roman Sklıar barlyq jumys ýaqytynda aıaqtalýy kerek ekenin eskertti.
Sonymen qatar jóndeý naýqany týraly birinshi vıtse-premerge «Qaraǵandy Energoortalyq» kompanııasynyń basshylyǵy da baıandady. Ol oblys ortalyǵynyń tutynýshylaryn jylýmen jáne elektr energııasymen qamtamasyz etedi. Quramyna eki energııa kózi kiredi: 3-JEO jáne 1-JEO. Aldaǵy jylý berý maýsymyna deıin jalpy 16 qazandyq pen 10 týrbına jóndeledi. Jumys keste boıynsha júrip jatyr. Bıylǵy jóndeý baǵdarlamasynyń jalpy quny 13 mlrd teńgeden asady.
Sondaı-aq Roman Sklıarǵa 3-shi jylý taratqysh qurylysynyń barysy týraly aıtyldy. Joba kezeń-kezeńmen júzege asyrylyp jatyr. Ony iske asyrý jylýmen jabdyqtaý júıesin jaqsartýǵa jáne qalanyń jańa nysandaryn jylýmen qamtamasyz etýge múmkindik beredi.
