Vıtse-premer Astanadaǵy qańtarylyp turǵan Ulttyq bıotehnologııa ortalyǵyn bıyl salyp bitirýdi tapsyrdy
ASTANA. QazAqparat - Úkimet basshysynyń orynbasary Gúlshara Ábdiqalyqova Bilim jáne ǵylym mınıstri Aslan Sárinjipovke Astanadaǵy qańtarylyp turǵan Ulttyq bıotehnologııa ortalyǵyn bıyl salyp bitirýdi tapsyrdy.
«2007 jyly Memleket basshysy Astanada 2008 jyldyń sońyna deıin Ulttyq bıotehnologııa ortalyǵyn salýdy tapsyrǵan bolatyn. Tapsyrmany oryndaý merzimi birneshe ret uzartyldy. Nysannyń qurylysy osy kúnge deıin bitken joq. Ol QazGZÝ ǵımaratyna qarama-qarsy tur. Osy ortalyqty bıyl tolyqtaı iske qosýdy tapsyramyn», - dedi ol búgin ótken QR Bilim jáne ǵylym mınıstrliginiń alqa májilisinde.
Jalpy, Úkimet basshysynyń orynbasary atap ótkendeı, ǵylymǵa bólinetin qarajat JІÓ-niń 3 paıyzyn qurasa da, tek keleshegi bar jobalar ǵana qarjylandyrylatyn bolady.
