Vıtse-premer Altaı Kólginov BQO-da turǵyndarmen, jastarmen júzdesti

Oral qalasynda Jáńgir han atyndaǵy Batys Qazaqstan agrarlyq-tehnıkalyq ýnıversıtetinde Altaı Kólginov aýyldyq jerlerge jetispeıtin mamandardy jiberý, olardy baspanamen qamtý jáne basqa máseleler tóńireginde jastarmen keńesti.

Premer-mınıstrdiń orynbasary qazirgi ýaqytta shaǵyn nesıe berý baǵytynda mınıstrlik tarapynan arnaıy baǵdarlama qabyldanyp, qomaqty qarjy bólinip otyrǵanyn jetkizdi.

«Osy baǵdarlama jergilikti jastarǵa jetip jatyr ma, qandaı usynystar bar, sony bilýge keldik», - dedi A.Kólginov.

Budan keıin jastar uıymdarynyń ókilderi sóz alyp, sportpen aınalysý, jańa jobalardy qolǵa alý, bos ýaqytty uıymdastyrý baǵytynda óz tájirıbe, pikirlerin bólisti.

Osyndaı mazmundaǵy turǵyndarmen kezdesý Terekti aýdanynda da bolyp, Premer-mınıstrdiń orynbasary jańadan salynyp jatqan aýrýhana qurylysymen tanysty.

Altaı Kólginov sondaı-aq Báıterek aýdany Makarov aýyldyq okrýgine qarasty Jalyn aýylynda boı kóterip jatqan toǵyzjyldyq mektep qurylysy basynda da boldy.

Bıylǵy aqpan aıynda bastalǵan shaǵyn jınaqty mektepti jańa oqý jylyna deıin bitirý kózdelýde.

Munda 60-tan astam adam jumys istep jatsa, sonyń ishinde jergilikti turǵyndar da bar.

Іri paneldi 54 oryndyq mekteptiń qurylysyn oraldyq «KazConstructionGroup» JShS júrgizýde. Tapsyrys berýshi –QPO b.v. kompanııasy.

«Memleket basshysy Qasym-Jomart Kemeluly Toqaev bilim sapasyn arttyrý máselesin udaıy nazarda ustap otyr. Kúni búgin respýblıka boıynsha 143 úsh aýysymdy jáne 52 apatty mektep bar. Bul másele úsh jyldyń ishinde sheshimin tabýy tıis. «Jaıly mektep» ulttyq jobasy men Úkimet tarapynan kórsetiletin qoldaýdy tıimdi paıdalanyp, isti sapaly oryndaýymyz kerek. Batys Qazaqstan oblysyndaǵy áleýmettik-ekonomıkalyq salada qordalanǵan máselelerdiń jaı-japsaryn bilý maqsatynda óńirge bes mınıstrdiń orynbasarlary da keldi. Birlesip ózekti degen problemalardy talqyladyq. Olar – bilim sapasy, ınternet máselesi, pedagog kadrlardyń tapshylyǵy, aýdandarda medıtsınalyq qural-jabdyqtardyń jetispeýi, barynyń ózi elý paıyzǵa jýyq tozǵandyǵy. Aıtý kerek, bıyl jáne kelesi jyly elimizde 50 ambýlatorııa men medpýnkt salynbaqshy. Bul – aýyldyq jerdegi medıtsınany damytýǵa jáne onyń qyzmet sapasyn arttyrýǵa baǵyttalǵan jumystardyń bir parasy. Eki aýdanaralyq aýrýhanany kúrdeli jóndeýden ótkizip, jańa qural-jabdyqtarmen qamtamasyz etý josparda tur. Jastar arasyndaǵy jumyssyzdyqty azaıtý da basty nazarda. Sondaı-aq «Aýyl amanaty» baǵdarlamasy boıynsha oblysqa 2,5 paıyzben 6,4 mlrd teńge qarajat bólindi. Osyndaı qoldaýdyń nátıjesinde aýyldaǵy aǵaıyn kásibin ashyp, turmys jaǵdaıyn jaqsarta alady», - dedi Altaı Kólginov.