Vıtse-mınıstrmen kezdesýde batysqazaqstandyq sharýalar ózekti máselelerdi kóterdi
Oblys ákiminiń birinshi orynbasary Arman Óteǵulovtyń qatysýymen ótken jıynda vıtse-mınıstr Joldaýdy ár memlekettik qyzmetshi oqyp qana qoımaı, qajet kezinde adamdarǵa qarapaıym tilmen túsindire bilýi kerektigin jetkizdi. Jyldyń basty qujatynda ár qyzmetker óz salasy boıynsha qandaı maqsat-mindetter alǵa qoıylǵanyn bilýi kerek. Memleket basshysynyń ıdeıalaryn júzege asyratyn da aldymen memlekettik qyzmetshiler. Sondyqtan Joldaý týraly uzaq-sonar baıandama jasamastan, vıtse-mınıstr jınalǵandarmen barynsha erkin áńgimelesip, olardyń ne túıgenderin aıqyndaýǵa tyrysty. Memleket basshysy Qazaqstanda agrarlyq sektor ekonomıkanyń jańa draıverine aınalýy kerektigin atap kórsetkeni belgili. Osy oraıda Qazaqstan Respýblıkasynyń agroónerkásip keshenin damytýdyń 2017-2021 jyldarǵa arnalǵan memlekettik baǵdarlamasy aıasynda QR Aýyl sharýashylyǵy mınıstrligi aldyna mańyzdy mindetter qoıylyp otyr. Aýyl sharýashylyǵy jumystary aýa raıy men tabıǵatqa táýeldi bolǵanymen, ozyq tehnologııalardy qoldana bilse, mol ónim alýǵa bolatyny beseneden belgili jaıt. Elimiz DSU-ǵa múshe bolyp kirgennen keıin talaptardyń qatańdatylǵany málim. Sondyqtan aldyńǵy qatarly memleketterden qalyp qoımas úshin zertteý jumystaryn keńinen júrgizip, álemdik talaptarǵa saı keletin ónim óndirýge umtylǵan jón. Eń bastysy, qandaı bolmasyn ónim básekege qabiletti bolýy kerek.
Kezdesý barysynda aýyl sharýashylyǵy taýaryn óndirýshiler de kókeıkesti máselelerdi kóterdi. Mysaly, belgili kásipker, oblystyq máslıhat depýtaty Qataýolla Ashyǵalıev ózge elderdiń tájirıbelerine súıene otyryp, memleket pen kásipkerler arasyndaǵy deldaldardy alyp tastaýdy usynyp, munyń eki jaqqa da tıimdi bolatynyn alǵa tartty. Sonda nesıe kózderi sharýalarǵa qymbatqa túspes edi. Sol sekildi Jáńgir han atyndaǵy Batys Qazaqstan agrarlyq-tehnıkalyq ýnıversıtetindegi zerthanany óńirlik deńgeıge kóterse, odan bári de utar edi. Kásipker Valerıı Goloýhovtiń sózine qaraǵanda, aýyl sharýashylyǵy tehnıkalary men qosalqy bólshekterdi monopolıst mekeme - «Evrazııa Grýpp» kompanııasy jetkizedi. Onyń ústine qosalqy bólshekterdi 10-15 kún kútýge týra keledi ári qymbatqa túsedi. Al egis jumystary kezinde kóktemniń ár kúni jylǵa azyq ekendigin dıhandar jaqsy biledi. Kásipker Temirǵalı Eskendirov aýyl sharýashylyǵy jobalaryn júzege asyrýǵa beriletin ekinshi deńgeıdegi bankterdiń nesıelik merziminiń qysqa ekendigin, oǵan qosa jańa tehnologııaǵa negizdelgen óndiriste qajetti mamandardyń jetispeıtinin aıtyp, bul rette de memleket tarapynan qoldaý kerektigin tilge tıek etti.
Osy tektes máselelerdi qoıyn dápterine túrtip alǵan Serik Egizbaev bulardyń barynsha eskeriletindigin jetkizdi.