Vıtse-mınıstr jer máselesi týraly: Biz qashan da ashyq suhbat berýge daıynbyz
«Ózderińizge belgili, 2016 jyldyń mamyr aıynda Elbasynyń Jarlyǵymen Jer kodeksiniń jekelegen normalaryna 2021 jyldyń 31 jeltoqsanyna deıin moratorıı engizildi. Atap aıtqanda, aýyl sharýashylyǵy maqsatyndaǵy jerlerdi qazaqstandyqtarǵa jeke menshikke, sheteldikterge berýge múldem tyıym salyndy. Bul rette Parlament depýtattarynyń ortalyq ýákiletti organdary, qoǵam qaıratkerleri men azamattyq qoǵam belsendileriniń qatysýymen arnaıy jer reformasy boıynsha komıssııa qurylyp, tıisti jumystar atqaryldy», - deıdi vıtse-mınıstr.
Erlan Nysanbaev komıssııa músheleri kelesi sheshimderdi qabyldaǵanyn atap ótti.
«Birinshi aýyl sharýashylyǵy jerlerin qazaqstandyqtarǵa jalǵa berý normasyn saqtaý jáne jetildirý. Ekinshiden, qazaqstandyqarǵa aýyl sharýashylyǵy jerlerin jalǵa berý mólsherin shekteý. Úshinshi shekara aýmaqtaryndaǵy aýyl sharýashylyǵy jerlerin paıdalaný talaptaryn kúsheıtý. Tórtinshi turǵyndardyń jaıylym alqaptaryna degen qajettiligin qamtamasyz etý. Atalǵan usynystardyń negizinde Jer kodeksine ózgerister men tolyqtyrýlar engizý boıynsha zań jobasy daıyndalyp, Parlament Májilisiniń qaraýyna engizildi», - deıdi ol.
Vıtse-mınıstrdiń aıtýynsha, zań jobasy qoǵamdyq keńes otyrystarynda, basqa da qoǵamdyq alańdarda jurtshylyqpen, aýyl sharýashylyǵynyń taýaryn óndirýshilerimen keńinen talqylanǵan.
«Birinshiden, aýyl sharýashylyǵy jerlerin qazaqstandyqtarǵa jalǵa berý normasyn saqtaý jáne jetildirý maqsatynda jalǵa berýdiń jańa tártibi qarastyrylyp otyr. Jer berý tártibiniń ashyqtyǵy men aıqyndylyǵyn qamtamasyz etý jáne jemqorlyqty boldyrmaý úshin konkýrsqa qoıylatyn jerler tizbesin bekitý, ony mindetti túrde qoǵamdyq keńester men ÚEU-men kelisý, jer komıssııasynyń quramyna 50 paıyzyn qoǵamdyq keńes pen uıymdardyń ókilderin engizý qarastyrylǵan. Sonymen birge, konkýrstyń jarııalylyǵy men oǵan barlyq qatysýshylardyń teń qol jetkizýin qamtamasyz etý úshin jańa tártip boıynsha konkýrstyń ótkiziletini týraly habarlandyrýdy tek aýdandyq ǵana emes, basqa da BAQ, AShM mınıstrligi men ákimdikterdiń resmı ınternet-resýrstarynda ornalastyrylady», - deıdi vıtse-mınıstr.
Erlan Nysanbaev ekinshiden aýyl sharýashylyǵy jerlerin úlken kólemde bir qolǵa berilýin boldyrmaý maqsaty kózdelgenin tilge tıek etti.
«Bir qolǵa beriletin jerlerdiń mólsherin máslıhattar men ákimdikterdiń birlesken usynystary negizinde Úkimetpen bekitiledi. Bul shekti mólsherdi aıqyndaý úshin tıisti esepteý ádistemesi ázirlengen. Úshinshi - memlekettik shekaranyń shekaralyq beldeýindegi aýyl sharýashylyǵy alqaptary eshkimge berilmeıdi. Tek jergilikti halyqqa jaıylym, shabyndyq maqsatynda paıdalanýǵa ruqsat beriledi. Shekaralyq aýmaqta ornalasqan jer ýchaskelerin sheteldikterge, QR-nyń sheteldiktermen nekege turǵan azamattaryna nemese QR-nyń quramynda sheteldikteri bar zańdy tulǵalaryna berýge tyıym salynady. Bul aýmaqta ornalasqan aýyl sharýashylyǵy jerleri tek qazaqstandyqtarǵa jalǵa beriletin bolady», - deıdi Erlan Nysanbaev.
Vıtse-mınıstr sonymen qatar, tórtinshiden jergilikti turǵyndardyń jeke aýyly ornalasqan aýyl sharýashylyǵy jerleri tek qazaqstandyqtarǵa ǵana jalǵa beriletinin atap ótti. Onyń sózine súıensek, jergilikti turǵyndardyń jeke aýylyndaǵy malynyń sany jyl saıyn ósýine baılanysty zań jobasymen jaıylym jetispeýshiligin sheshý maqsatynda eldimekender aınalasynda jaıylym alańdaryn aıqyndaýdyń normasy kózdelgen. Osy maqsatta aıqyndalǵan jaıylymdardy QR jeke jáne zańdy tulǵalaryna jalǵa berýge tyıym salynady.
Vıtse-mınıstr eldimekenderdiń mańyndaǵy jaıylymdardyń kóbi jeke jáne zańdy tulǵalarǵa berilip ketkenin eskerip, ákimdikterge ol jerlerdi qaıta halyqtyń jaıylym muqtajdyǵy úshin memlekettik qajettikke jatqyzý qarastyrylyp otyrǵanyn aıtady.
«Erekshe nazar aýdaratyn jaǵdaı - atalǵan normalardan bólek, zań jobasymen aýyl sharýashylyǵy jerlerin berýge engizilgen moratorııdiń sheńberin tek sheteldikterge ǵana emes, bir paıyz bolsa da sheteldik úlesi bar qazaqstandyq zańdy tulǵalarǵa keńeıtý qarastyrylyp otyr. Bul rette zań jobasy normalarynyń barlyǵy aýyl sharýashylyǵy jerlerin tek qana qazaqstandyqtarǵa berýdi kózdeıdi. Zań jobasynyń mátinimen AShM resmı saıtynyń Jer kodeksi bóliminde tanysa alasyzdar. Óz kezegimizde biz ashyq suhbat berýge qashan da daıynbyz», - dep túıdi Nysanbaev.
Aıta ketsek, qazirgi ýaqytta QR Parlament Májilisinde «Jer qatynastaryn retteý máseleleri boıynsha QR keıbir zańnamalyq aktilerine ózgerister men tolyqtyrýlar engizý» týraly zań jobasy qaralýda.
