Vıtse-mınıstr jedel járdem qyzmetkerlerine jasalatyn shabýylǵa qatysty pikir bildirdi
Aıta ketsek, Ortalyq kommýnıkatsııalar qyzmetinde ótken baspasóz máslıhatynda Alekseı Tsoıǵa jedel járdem qyzmetkerleriniń zardap shegip jatatynyna qatysty suraq qoıylǵan edi.
«15 qańtarda Astanada jedel járdem brıgadasyna shabýyl jasaldy. Sol kezde feldsherdiń basynan jaraqattanǵany belgili bolyp otyr. Osy jaǵdaıǵa baılanysty qandaı aqparattaryńyz bar? Mundaı jaǵdaılar elimizde qanshalyqty jıi kezdesedi? Bul máselemen qalaı kúresýge bolady?» - degen suraq qoıyldy Alekseı Tsoıǵa.
Vıtse-mınıstr bul suraqqa jaýap bere kele, ókinishke qaraı, ondaı jaǵdaılar kezdesetinin aıtty.
«Densaýlyq saqtaý bolsyn, basqa sala bolsyn mundaı jaǵdaılar tirkelip jatady. Quqyq qorǵaý organdary mundaı jaǵdaılarǵa óz baǵasyn bere jatar. Bizde zańnama boıynsha qylmystyq kodekste de, ákimshilik quqyqbuzýshylyq kodeksinde de bul turǵyda jaýapkershilik qarastyrylǵan. Sondyqtan, bul quqyqtyq alań. Álbette, bul bizdi qýantpaıdy. Bálkim, adamdar emotsıonaldy bolýy nemese basqa jaǵdaıda adamdar ashýǵa berilýi múmkin. Budan eshkim de saqtandyrylmaǵan. Ókinishke qaraı, osyndaı jaǵdaılar kezdesedi. Biraq, mundaı ýaqytta bizge quqyq qorǵaý organdarynyń adamdary kelip, iske óz baǵasyn beredi», - dep jaýap berdi Alekseı Tsoı.
Eske sala ketsek, OKQ-da ótken baspasóz máslıhatynda QR Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy - bas memlekettik sanıtar dáriger Jandarbek Bekshın turǵyndar mindetti túrde qyzylshaǵa qarsy ekpe jasatýy kerektigin habarlaǵan bolatyn.