Vıtse-mınıstr UBT erejesin buzyp, nátıjesi joıylǵan 153 talapkerge qatysty pikir bildirdi
«Mektepten shyqqan oqýshylardyń basym kópshiligi ulttyq biryńǵaı testileý tapsyrǵan kezde túrli erejeni buzý áreketterine umtylyp turady. Biraq jyl boıy daıyndalmaǵan balaǵa ol kómektespeıdi. Zańsyz jolmen alǵan baldary erejeniń tártibine saı 31 jeltoqsanǵa deıin tekseriledi. UBT jazda aıaqtalady. Al tamyz aıynda talapkerler oqýǵa túsip, qyrkúıekte sabaqqa kiredi. Osy aralyqta post-monıtorıng júrgiziledi. Komıssııa qurylyp, barlyq balanyń testileý kezindegi beınejazbasy qaıta qaralady. Oǵan birshama ýaqyt kerek. Búgingi tańda zańsyz ball jınaǵan 153 bala anyqtaldy», - dep tekseris jumystarynyń nátıjesimen bólisti vıtse-mınıstr.
Talǵat Eshenqulov bul oqýshylardyń nátıjeleri joıylǵanmen, olar UBT-ny aqyly negizde qaıta tapsyra alatynyn málimdedi.
«Ulttyq biryńǵaı testileýdi jyl boıy bes ret tapsyrady. Onyń ekeýi grant alý úshin, úsheýi aqyly negizde oqýǵa túsý úshin. Osy 153 balanyń UBT-dan aqyly túrde ótkenin rastaıtyn sertıfıkaty bolsa, onda talapker ýnıversıtetke aqyly formaǵa aýysyp, ári qaraı oqýyn jalǵastyrady. Eger ondaı sertıfıkaty bolmasa, ol sol oqý ornyna shartty túrde qabyldanady. Keıin qańtar aıynda qaıtadan UBT tapsyryp, 50-den joǵary ball jınasa, ol ári qaraı oqı beredi. Shekti ball jınaı almaǵan jaǵdaıda bala oqýdan shyǵarylady», - dedi Talǵat Eshenqulov.
Aıta keteıik, buǵan deıin vıdeojazbalardy tekserý qorytyndysy boıynsha bıyl grantqa ilingen 137 talapkerdiń UBT nátıjesi jaramsyz dep tanylǵanyn jazǵan edik.
Sonymen qatar, vıtse-mınıstr «Jibek Joly» telearnasyna bergen suhbaty barysynda Almatyda áli 500 ctýdent eshqaıda ornalastyrylmaǵanyn málim etti.
