Vıtse-mınıstr: Tek sapaly ónim ǵana suranysqa ıe

NUR-SULTAN. QazAqparat – Saýda jáne ıntegratsııa vıtse-mınıstri Azamat Asqarulynyń aıtýynsha, Úkimet jeńil ónerkásip salasyndaǵy kásiporyndarǵa barynsha qoldaý kórsetip keledi, dep habarlaıdy QazAqparat tilshisi.

«Jalpy, jeńil ónerkásip – biz úshin óte mańyzdy sala. Úkimet barynsha qoldaý bildirip otyr. Qazir jeńil ónerkásiptiń 10 paıyzdyq kólemi eksportqa shyǵarylyp jatyr. Bul óte tómen kórsetkish. Ekinshiden, ol eksport áleýetiniń zor ekenin de aıǵaqtaı túsedi. Biz eń aldymen, ónimniń sapasyna basa nazar aýdarýymyz kerek. Tek sapaly ónim ǵana el ishinde emes, shetelde de suranysqa ıe bolary anyq», - dedi vıtse-mınıstr Qazaqstandaǵy jeńil ónerkásip salasy óndirýshileriniń otandyq jıynynda.

Azamat Asqarulynyń aıtýyna qaraǵanda, Qazaqstan úshin Qytaı men Reseı negizgi eksporttyq naryq bolyp sanalady.

«Mınıstrlik bizdiń eksportty qoldaý baǵytynda qajetti quraldarǵa ıe. Eń aldymen, eksporterlardyń shyǵynyn jabylyp otyrady. Búgingi kúni eksortqa shyǵatyn shaǵyn bıznes shyǵynynyń 60 paıyzyn memleket jaýyp otyr. Onyń ústine shetelde saýda sórelerin alyp berý, fılıaldardy ustaý, taýarlardy sertıfıkattaý isinde de edáýir kómek kórsetiledi. Qazir jeńil ónerkásip salasyndaǵy 30 kásiporyn – eksportaýshy kásiporyndar. Olardyń 11-i memlekettiń qoldaýyn alǵan», - dedi ol.