Vıtse-mınıstr sý tarıfin qalaı tómendetý kerektigi týraly aıtty

NUR-SULTAN. QazAqparat - Sýmen jabdyqtaý kózinen bastap túpkilikti tutynýshyǵa deıin sý tarıfi birdeı bolady. Bul týraly búgin Úkimet úıindegi baspasóz máslıhatynda QR Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev aıtty, dep habarlaıdy QazAqparat tilshisi.

«Qazirgi ýaqytta jumys istep turǵan «Qazsýshar» memlekettik kásiporny bazasynda Biryńǵaı operator qurýdy josparlap otyrmyz. Búgingi kúni onyń quramynda 11 myń jumysshy bar, materıaldyq-tehnıkalyq jabdyqtalýy da jaman emes», - dedi vıtse-mınıstr.

Osy oraıda, ol jańa kásiporyn qurylmaıtyndyǵyn basa aıtty.

«Ekinshiden, aýyldyq eldi mekenderde taratý jelilerin jobalaý jáne salý múmkinshiligin alamyz. Ázirshe olar bizde eldi mekenderdiń shekaralaryna deıin ǵana bar. Bul shyǵyndardy tómendetýge múmkindik beredi. Biryńǵaı operator bolǵan kezde joba da sapaly bolady. Buǵan qosa, adamı resýrstarda jáne materıaldyq-tehnıkalyq turǵyda ózge de múmkinshilikter paıda bolady», - dedi ol.

Sonymen qatar, birinshi vıtse-mınıstr mundaı sharalar bıýdjet qarajatynyń shyǵystaryn da aıtarlyqtaı qysqarta túsetindigin atap ótti.

«Deldaldardy joıatyndyǵymyzda da úlken basymdyq bolyp sanalady. Qazirgi ýaqytta biz tarıfterdiń bir bóligin sýbsıdııalaımyz jáne ol eldi mekenderdiń shekarasyna deıin ǵana jumys isteıdi. Ary qaraı deldal paıda bolyp, qyzmetine ústeme qun qosady. Endigi ýaqytta sýmen jabdyqtaý kózinen bastap túpkilikti tutynýshyǵa deıin biryńǵaı baǵa bolady. Sol arqyly tarıf kólemin tómendetemiz», - dedi Q.Óskenbaev.