Vıtse-mınıstr shıpajaıǵa joldama berýdegi ózgerister týraly aıtty

NUR-SULTAN. QazAqparat - QR Eńbek jáne halyqty áleýmettik qorǵaý vıtse-mınıstri Svetlana Jaqypova múmkindigi shekteýli jandardy saýyqtyrý máselesi týraly aıtty, dep habarlaıdy QazAqparat tilshisi.

«Sanatorıı-kýrorttyq emdeý ornyn tańdaý memlekettik satyp alýlar arqyly júzege asyrylady. Nysan mindetti túrde múmkindigi shekteýli jandarǵa qoljetimdi bolýy kerek. Mádenıet jáne sport, Densaýlyq saqtaý mınıstrlikterimen birlesip, bul nysandardy qyzmet kórsetýshiler tizbesine tirkelýin jáne qoljetimdilik pasportynyń bolýyn mindetteýdi kózdep otyrmyz», - dedi vıtse-mınıstr Úkimet úıinde ótken baspasóz máslıhatynda.

Onyń aıtýynsha, áleýmettik qyzmetter portaly iske qosylǵan soń, adamdar sanatorııge tańdaý jasaı alady.

«Máselen, Nur-Sultan qalasyndaǵy múmkindigi shekteýli jandar tańdaý jasaı almaıdy. Qaı jeri aýyrsa da, Qotyrkólge jiberiledi. Portal iske qosylǵanda, adam óz densaýlyǵyna qaraı shıpajaı tańdaı alady. Tirek-qımyl júıesi buzylsa, Moıyldyǵa nemese balshyqpen emdeýge bolady degendeı. Qazir bul másele portaldyń jumysyna tikeleı baılanysty», - dedi Svetlana Jaqypova.

Aıta keteıik, 2019 jyldyń 1 shildesinde Áleýmettik qyzmetter portaly pılotty túrde Aqtóbe qalasynda iske qosylady.