Vıtse-mınıstr RF-dan benzın ákelýdi ýaqytsha shekteý sebebin túsindirdi
«Eýrazııa ekonomıkalyq odaq aýmaǵynda ortaq munaı jáne gaz naryǵy 2025 jylǵa qaraı qurylatyn bolady. Búgingi kúni munaı ónimderin satýda biz eki jaqty negizde jumys isteýdemiz. Jyl saıyn bajsyz alynatyn munaı ónimderiniń kólemine arnalǵan ındıkatıvtiń teńgerimge qol qoıamyz. Bıylǵy jyly biz Reseıden 1,1 mıllıon tonna benzın ımporttaýdy josparlap otyrmyz. Degenmen birinshi jartyjyldyqtyń qorytyndysy boıynsha osy kólemdi qarqyndy túrde ıgerdik. Sondyqtan da úsh aılyq merzimge ýaqytsha shekteýler engizildi»,-dep habarlady vıtse-mınıstr.
Sondaı-aq ol osy ýaqytsha shekteýdiń reseılik seriktestermen kelisilgendigin atap ótti. «Eshqandaı problemalar men qıyndyqtar joq. Bul jumys protsesi. Atyraý jáne Pavlodar zaýyttaryn qaıta jańartý jumystary aıaqtalǵannan keıin bizde benzın óndirisi artqandyǵyn aıta ketý qajet»,-dedi M. Myrzaǵalıev.
