Vıtse-mınıstr: Reseı naryǵyna engen otandyq kompanııalar problemalaryn aıta bermeıdi
«EAEO degende ákimshilik kedergilerden buryn óte mańyzdy máselelerdiń biri – básekelestik. Ózińiz biletindeı, Reseı úlken memleket bolǵandyqtan, onda sapaly taýar shyǵaratyn kompanııalardyń sany óte kóp. Sondyqtan, sapaly taýarlarmen birinshiden básekelestikke túsý kerek. Odan bólek, basqa memleketterden ımporttalatyn taýarlar da bar. Olarmen da báseke qyzý bolýy tıis. Úshinshiden, olardy utqannan keıin ǵana kedergiler paıda bolýy múmkin. Máselen, «Zenchenko» kompanııasy (RF naryǵyna kirgen) 5 qyrkúıekte saýda sórelerinde tek 2-3 paıyzdyq múmkindik beriletinin aıtqan edi. Ol másele boıynsha biz Ulttyq ekonomıka mınıstrligimen jumys júrgizdik. Másele tekserilip jatyr», - dedi ol OKQ-da ótken baspasóz máslıhatynan keıin tilshilerge bergen jaýabynda.
Vıtse-mınıstrdiń aıtýyna qaraǵanda, qazaqstandyq bılik otandyq kompanııalar betpe-bet kelgen máselelerdi sheshýge tyrysady.
«Kóptegen kompanııa bizge problemalaryn aıtpaıdy. Óıtkeni, olar kelesi joly RF bazarlarynda taýarymyzdyń joly jabyla ma dep qorqady. Jalpy Saýda jáne ıntegratsııa mınıstrligi qazaqstandyq taýarlardyń shetelde ótkizilýine múddeli. Biz kásipkerlerimizdiń múddesin qorǵap, barlyq túıindi máselelerdi sheshkimiz keledi. Alaıda ol problemalar týraly qoryqpaı aıtý kerek. Máselege keziktiń be – sabyrdy túrde suraqtardy pysyqtap, ortaǵa salý kerek. Sonda ǵana bizde áriptesterimizge qarsy naqty argýmenttermen shyǵa alar edik. Bálkim, bir jerde tehnıkalyq qatelik bolýy múmkin, bir jerde tipti túsinispeýshilik týyndaǵan bolar. Sol sebepti, bizdiń taýardy kórshi elderdiń naryqtary qoldan kirgizbeı otyr deýge bolmaıdy. Árbir jaǵdaıdy jeke-jeke qarastyrǵan abzal», - dedi ol.
Eske sala ketsek, osydan birneshe kún buryn Armenııa astanasy Erevanda ótken Joǵary Eýrazııalyq ekonomıkalyq keńestiń otyrysynda birneshe másele kótergen bolatyn. Memleket basshysynyń aıtýynsha, EAEO-da keıde ulttyq naryqtarda óziniń taýar óndirýshilerin qorǵaý mańyzdy sıpatqa ıe bolyp jatady.
«Biz erkin saýda aınalymy úshin qajetti normatıvti bazany jasadyq. Bul – jetistik. Alaıda is júzine kelgende ulttyq naryqtarda jeke jaǵdaılarda óziniń taýar óndirýshilerin qorǵaý talap-tilegi – ıntegratsııanyń maqsaty men mindetterden mańyzdy sıpatqa ıe bolyp ketip jatady. Ártúrli saraptamalar, aımaqtyq deńgeıdegi qosymsha talaptar, jasyryn nusqaýlar berý máselesi bar», - dedi Qasym-Jomart Toqaev jıynda.
