Vıtse-mınıstr petıtsııaǵa shyǵarýǵa bolmaıtyn máselelerdi atady

ASTANA. QazAqparat – Májiliste ótken dóńgelek ústel otyrysynda «Qoǵamdyq baqylaý týraly» Zań jobasyn tanystyrǵan Aqparat jáne qoǵamdyq damý vıtse-mınıstri Danııar Qadyrov petıtsııa berý tártibi zańnamamen qalaı retteletinin aıtty, dep habarlaıdy QazAqparat tilshisi.

«Zańnamada «petıtsııa» uǵymy aıqyndalady. Sonymen birge, petıtsııa berý jónindegi ótinishti Qazaqstan Respýblıkasynyń azamattary arnaıy ınternet portaly arqyly bere alady. Ákimshilik rásimdik-protsestik kodekste petıtsııalardy berý jáne qaraý tártibi bekitiledi. Memleket pen azamattyq qoǵamnyń ózara is-qımyly salasyndaǵy ýákiletti organ petıtsııanyń belgilengen sharttarǵa sáıkestigin aıqyndaıdy. Sharttarǵa sáıkes kelmegen petıtsııa qabyldanbaıdy», - dedi ol.

Vıtse-mınıstr atalǵan sharttarǵa qandaı bastamalar sáıkes kelmeıtinin de atady.

«Memlekettik basqarý nysany, ákimshilik-aýmaqtyq qurylymy men shekaralaryn ózgertý, sot tóreligi, raqymshylyq, ulttyq qaýipsizdik sııaqty máselelerge qatysty petıtsııalar berýge tyıym salynǵan. Petıtsııa berýge tyıym salynǵan buǵattar ulttyq zańnamamen retteledi», - dedi Danııar Qadyrov.