Vıtse-mınıstr namazxanalardyń jabylý sebebin túsindirip berdi

ASTANA. QazAqparat - QR Din isteri jáne azamattyq qoǵam vıtse-mınıstri Berik Arynnyń aıtýynsha, osydan úsh jyl buryn qabyldanǵan erejege sáıkes, namazxanalar memlekettik organdardan úsh júz metr shalǵaı jerde ornalasýy tıis. Alaıda bolashaqta atalǵan erejege ózgerister engizilýi ábden múmkin, dep xabarlaıdy QazAqparat tilshisi.

«Bul ereje 2013 jyly qabyldanǵan bolatyn. Ol kezde Din isteri agenttigi bolǵan. Sol erejege sáıkes, quqyq qorǵaý, áskerı jáne taǵy basqa memlekettik organdardyń 300 metrlik radıýsynda sondaı dinı oryndar (namazxanalar -avt.) ornalaspaýy kerek. Endi, ýaqyt ózgerip jatyr ǵoı. Mysaly, keıbir jerlerde ol ornalasqannan keıin onda basqa bir mekemeler ashylyp jatyr. Mysaly, osyǵan baılanysty Astana qalalyq din isteri basqarmasy tekseris júrgizip, sol normalardyń oryndalýyn qadaǵalap otyrady», - dedi B.Aryn QazAqparat tilshisine bergen suxbatynda.

Onyń aıtýynsha, búginde mınıstrlik ókilderi áleýmettik jelilerde xalyqtyń namazxanalardyń jabylýyna qatysty alańdaýshylyǵyn kórip, bilip otyr. Osyǵan baılanysty aldaǵy ýaqytta erejege ózgerister engizilýi ábden múmkin.

«Biz osy máselege qatysty barlyq usynystardy qarap jatyrmyz. Bolashaqta erejelerge ózgerister engizilgen kezde sol usynystardyń barlyǵyn qaraımyz. Dál qazir tek sol erejege sáıkes kelmeıtin namazxanalar ǵana jabyldy. Degenmen, árbir fakti boıynsha tekseris júrgiziledi», - dep atap kórsetti vıtse-mınıstr.

Aıta keteıik, «Dinı qyzmet jáne dinı birlestikter týraly» zańdy túsindirýge arnalǵan búgingi baspasóz máslıxatynda Berik Aryn destrýktıvti aǵym ókilderiniń ımamdarmen daýlasyp, meshitke kelýshilerdi qorqytyp jatqanyn jetkizdi. Osy oraıda ol dereý polıtsııaǵa xabarlasýǵa keńes berdi. Sebebi ondaı áreketter zańmen qýdalanady.

Budan bólek, vıtse-mınıstri «Memlekettik qyzmetshilerge juma namazyna barýǵa ruqsat bar ma?» degen suraqqa jaýap berdi.