Vıtse-mınıstr: Qazaqstanǵa reseılik benzın qajet bolmaı qaldy

ASTANA. QazAqparat - Reseıden Qazaqstanǵa benzın tasymaldaý toqtatylady. Bul týraly Ortalyq kommýnıkatsııalar qyzmetinde QR Energetıka vıtse-mınıstri Bolat Aqsholaqov málim etti, dep habarlaıdy QazAqparat tilshisi.

«Reseımen aradaǵy kelisim aıasynda Qazaqstanǵa aýmaǵyna jetkiziletin ónimderdiń kólemi men túrleri kelisilgen. Bul kelisimderge elimizde munaı ónimderine eleýli tapshylyq bolǵan kezde qol qoıylǵan edi. Osy oraıda RF tarapy qajetti kólemdi qamtamasyz etýge qaýqarly boldy. Biz olarmen EEK aıasynda ekijaqty kelisimdi bekittik jáne ol qujat 2015 jyly kúshine endi. Onda janar-jaǵarmaıdyń barlyq túrleri qamtyldy. Dástúrli túrde 900 myń tonnaǵa tarta joǵary oktandy benzındi, 400 myń tonnaǵa jýyq dızel otynyn, sondaı-aq 250-270 myń tonna avıatsııalyq kerosındi tasymaldadyq. Bul kólem bizdiń naryqta qajet boldy», - dep toqtaldy B. Aqsholaqov.

Vıtse-mınıstr sońǵy jyldary elimizdegi munaı óńdeý zaýyttarynda júrgizilgen jańǵyrtý jumystarynan keıin, atalǵan otyn túrlerimen qamtamasyz etý deńgeıi artqanyn eske salyp ótti.

«Sáıkesinshe, zaýyttar jańǵyrtylǵannan soń, búginde bizde ımporttyq AI-92 benzınine qajettilik múldem joq. Sondyqtan osy otyndy syrttan ákelýge tyıym salmaqpyz. Bul rette reseılik áriptesterimizdi eskerttik, olar bul qadamǵa qarsy emes. Atap aıtqanda, olar bizge buǵan deıin jiberip kelgen munaı ónimderi kólemin úshinshi naryqtarǵa shyǵarýǵa qyzyǵýshylyq tanytyp otyr. Atap aıtqanda, RF úshin bul tıimdi», -  dedi vıtse-mınıstr.

Onyń sózine qaraǵanda, ımporttan bas tartýǵa qatysty shekteýler temirjolmen tasymalǵa arnalǵan.

«Eger de biz ımportqa tyıym salsaq, ol temirjol kóligimen tasymalǵa qatysty bolady, ıaǵnı avtkólikke baılanysty emes. Sondyqtan da Reseımen shekaralas óńirlerde qajetti kólem tasymaldanýy múmkin, alaıda temirjol arqyly aýqymdy mólsherde ımporttaý bolmaıdy», - dep naqtylady Aqsholaqov.

«Bul buıryq Ádilet mınıstrliginde tirkeýge engizildi. Ol shyqqannan keıin, kúshine enedi. Menińshe, 10 tamyzǵa qaraı ol qujat tirkeýden keıin jarııalanady.  Sondaı-aq, 10 kúninnen keıin kúshine enedi. Bul turǵyda barlyq temirjol ınstansalaryna eskertý jasalady», - dedi mınıstrdiń orynbasary.

Esterińizge sala keteıik, bıyl maýsym aıynda Energetıka mınıstri Qanat Bozymbaev Qazaqstan reseılik benzındi ımporttaýdy toqtatatynyn aıtqan edi.