Vıtse-mınıstr Qazaqstanda PTR test jasaý tehnologııasymen tanysty
Vıtse-mınıstr aralaǵan alǵashqy nysandardyń biri Ortalyq referenttik zerthana boldy. Bul jerde ol mıkroaǵzalardyń respýblıkalyq kollektsııasymen jáne III deńgeıli bıologııalyq qaýipsizdik zerthana jumysymen tanysty. Sondaı-aq, COVID-19 vırýsyn anyqtaýǵa arnalǵan qazaqstandyq PTR test jasaýdyń materıaldary tanystyryldy jáne halyqaralyq trenıngtik ortalyqtyń qyzmeti baıandaldy.
Kezdesý barysynda Marat Shoranov indetke qarsy kúrestiń áleýetin talqylady. Atap aıtqanda, ǵylymı zertteýlerdi ilgeriletýdi, nano-ekpeni daıyndaýdy jáne indetke qarsy ózindik ónim óndirý barysynda ımport almastyrýdy damytý máselesi pysyqtaldy.
Budan ári Marat Shoranov №29 qalalyq emhanany aralap, dárigerlermen sóılesti. Sonymen qatar, naýqastarmen qashyqtan baılanys ornatý arqyly tildesti. Atalǵan emhana 32 ýchaske boıynsha jalpy sany 50 myńnan astam halyqqa qyzmet kórsetedi.
Emhananyń bas dárigeri Aqmeıir Sadyqovanyń aıtýynsha, sońǵy kezderi naýqastar arasynda qashyqtan qyzmet alý úrdisi damyǵan. Mysaly, koronavırýstyq ınfektsııa men ishki aýrýǵa shaldyqqa naýqastar úshin arnaıy qurylǵan monıtorıng ortalyǵy keńes beredi.
Pandemııa bastalǵaly naýqastardyń medıtsınalyq qyzmetke tolyqtaı qoljetimdiligin arttyrýǵa basymdyq berildi. Osy maqsatta 11 648 qashyqtan qyzmet kórsetildi. Medıtsınalyq uıymdardyń janynan qurylǵan 10 mobıldi brıgada kún saıyn keminde 130 márte adamdardyń úıine baryp qyzmet kórsetti.
Vedomstva basshysynyń orynbasary ákimdik ókilderimen, baqylaý tobymen jáne qalanyń bas sanıtarlyq dárigerimen «Sary arqa» bazaryn aralap, karantındik talaptardyń saqtalýyn tekserdi.