Vıtse-mınıstr «Qazaqstan halqy» kartasynyń artyqshylyǵyn aıtty
ASTANA. QazAqparat - Astanada ótken Qazaqstan halqy Assambleıasy keńesiniń otyrysynda QR Bilim jáne ǵylym vıtse-mınıstri Ashat Aımaǵambetov «Qazaqstan halqy» ınteraktıvti kartasy týraly baıandap berdi, dep habarlaıdy QazAqparat tilshisi.
Vıtse-mınıstrdiń aıtýynsha, QR Bilim jáne ǵylym mınıstrligi «Qazaqstan halqy» ınteraktıvti kartasyn ǵylymı negizde qurastyrý boıynsha Memleket basshysy bergen tapsyrmalardy sapaly ári ýaqtyly oryndaý úshin QHA birlesken jumys tobyn qurǵan. Sondaı-aq, tarıh, geografııa, aqparattyq jáne esepteý tehnologııalary salalarynyń ǵalymdary kartany qurastyrýǵa qol ushyn sozǵan.
«Qazirgi ýaqytta tapsyrmany úsh ǵylymı-zertteý ınstıtýty júzege asyrýda, olar - Sh.Ýálıhanov atyndaǵy tarıh jáne etnologııa ınstıtýty, Geografııa ınstıtýty men Aqparattyq jáne esepteý tehnologııalary ınstıtýty. Jobadaǵy qoǵamdyq-mádenı baǵyttylyqtyń jarqyn kórinis tabýy onyń tanymdyq qundylyǵyn arttyra túsedi. Bul jumysqa kiriserde álemdik tájirıbelerdi zerttedik», - dedi Ashat Aımaǵambetov.
«Qazaqstan halqy» zııatkerlik ǵylymı kartasynda el halqynyń etnıkalyq tarıhy, salt-dástúrleri, qonystaný úrdisteri kórsetiledi. Joba zamanaýı Veb-GIS tehnologııalaryna negizdelgen.
Sonymen birge, vıtse-mınıstr «Qazaqstan halqy» kartasynyń álemniń kez kelgen núktesinde, kez kelgen qoldaný ınterfeısinde, mobıldi, statsıonarlyq qurylǵylarda qoljetimdi bolatynyn atap ótti. Odan bólek, mundaı halyq qartalary AQSh pen Reseıde, Eýropa elderinde bar.
