Vıtse-mınıstr Qaıyrov: Tikeleı ınvestıtsııalardyń kólemi artyp keledi
ASTANA. QazAqparat - Qazaqstan ekonomıkasyna quıylyp jatqan shetel ınvestıtsııalarynyń kólemi artyp otyr, dep xabarlaıdy QazAqparat tilshisi.
QR Investıtsııalar jáne damý vıtse-mınıstri Erlan Qaıyrovtyń aıtýynsha, qazirgi kezde memleket basshylyǵy ol ınvestıtsııalardyń óńdeý salasyna salynǵanyn qalaıdy. "Sońǵy on eki jyldyń ishinde Qazaqstan ekonomıkasyna 245 mlrd dollardan astam shetel ınvestıtsııalary quıyldy. Ashyǵyn aıtý kerek, ol aqshanyń basym bóligi paıdaly qazbalardy ıgerýge salyndy. Sondyqtan qazirgi kezde el úkimetine naqty maqsat qoıylyp otyr. Ol - ınvestıtsııalardy óńdeý salasyna tartý", - dedi Qaıyrov búgin qurmetti konsýldar sezinde.
Vıtse-mınıstrdiń sózine qaraǵanda, ótken jyly el ekonomıkasyna tartylǵan ınvestıtsııalardyń jalpy kólemi 2015 jylmen salystyrǵanda 40 paıyzǵa artyq boldy. "Al sońǵy málimetterge sáıkes, aǵymdaǵy jyldyń birinshi toqsanynda tikeleı shetel ınvestıtsııalarynyń kólemi 20 paıyzǵa ósti", - dep atap kórsetti Qaıyrov.
Aıta keteıik, búgin QR Syrtqy ister mınıstrliginiń bastamasymen shet memleketterdegi Qazaqstan Respýblıkasynyń jáne QR-daǵy shet memleketterdiń qurmetti konsýldarynyń sezi uıymdastyryldy. Atalǵan sharanyń negizgi maqsaty - Qazaqstandaǵy shetel ınvestorlary úshin jasalyp jatqan jaǵdaılardy jan-jaqty túsindirý, ol aqparatty konsýldar arqyly barlyq ınvestorlarǵa jetkizý.
