Vıtse-mınıstr Qaraǵandydaǵy AІІB jańa ǵımaratynda boldy
QARAǴANDY. QazAqparat - QR Іshki ister mınıstriniń orynbasary Erlan Turǵymbaev oblysqa jasaǵan jumys sapary barysynda Qaraǵandydaǵy Kırov aýdandyq ІІB jańa ǵımaratynda boldy, dep habarlaıdy «QazAqparat» HAA tilshisi.
Jańa ǵımaratty general-maıor Erlan Turǵymbaev pen oblys ákimi Erlan Qoshanov birge aralap kórdi.
Ǵımarattyń qurylysy 2014 jyly bastalǵan. Táýelsizdik jyldarynan beri bul oblystyq ishki ister organdaryna arnap salynǵan alǵashqy nysan. Munda zamanaýı kezekshilik bólimi, ashana, arhıv, úlken is-shara jáne konferentsııa zaldary, demalý, tamaqtaný bólmeleri bar.
Endi ár qyzmetkerdiń barlyq qajetti qurylǵylarmen jáne jıhazdarmen jabdyqtalǵan jeke kabıneti bar.
«Jańa ǵımarattyń qajettiligi burynnan aıtylyp kele jatqan edi. Eski ǵımarat 1961 salynǵan, onyń ústine kúrdeli jóndeý qajet bolatyn. Endi mundaı yńǵaıly ǵımarattyń ishinde otyrǵan polıtsııa qyzmetkerlerine aıanbaı eńbek etip, ózderiniń qyzmettik boryshtaryn adal atqarý ǵana qaldy», - dedi Qaraǵandy oblystyq ІІD basshysy Mergenbaı Japparov.
Vıtse-mınıstr Kırov aýdandyq polıtsııa bóliminiń barlyq ǵımarattaryn aralap kórdi.
