Vıtse-mınıstr EUÝ-da muǵalim ústine kabınet tóbesiniń qulap túsý jaǵdaıyna qatysty pikir bildirdi

NUR-SULTAN. QazAqparat – Bilim jáne ǵylym vıtse-mınıstri Sholpan Karınova L.Gýmılev atyndaǵy Eýrazııa ulttyq ýnıversıtetinde muǵalimniń ústine tóbe taqtaıshasy qulap ketip, ol sabaǵyn ótize almaǵan jaǵdaıǵa qatysty pikir bildirdi, dep habarlaıdy QazAqparat tilshisi.

«Muǵalimde bári jaqsy. Eshqandaı qýdalaý bolǵan emes. Atalǵan muǵalimdi (Dana Kópejanova-avt) sabaqty ótkizbeı qoıdy dep eshkim jazalaǵan joq. Eshqandaı jaza bolmaıdy da. JOO-nyń, Bilim jáne ǵylym mınıstrliginiń ustanymy osyndaı. Jalpy, stýdentter úshin de, muǵalimder úshin barlyq jaǵdaı jasalyp jatyr. Sondyqtan, muǵalim eshqandaı sebep boıynsha qýdalanbaıdy», - dedi Sholpan Karınova OKQ-da ótken baspasóz máslıhatynan keıin tilshilerdiń suraǵyna bergen jaýabynda.

Bilim jáne ǵylym vıtse-mınıstri JOO oqytýshysynyń eshqandaı sógis almaǵanyn habarlady.

Aıta ketsek, osydan birneshe kún buryn BAQ-ta jáne áleýmettik jelilerde L.Gýmılev atyndaǵy Eýrazııa Ulttyq ýnıversıtetiniń muǵaliminiń ústine kabınet tóbesiniń shaǵyn bóliginiń qulap ketkeni týraly vıdeo taraǵan bolatyn. Ondaǵy málimetterge súıensek, oqıǵadan keıin L.Gýmılev atyndaǵy EUÝ-niń saıasattanýy kafedrasynyń oqytýshysy Dana Kópejanova dárigerdiń kómegine júginýge zárý bolǵan. Alaıda ýnıversıtettiń dıspetcherlik qyzmety ony «kelesi sabaqty ótkizbedi» dep jazyp jibergen kórinedi.

Alaıda keıin L.Gýmılev atyndaǵy Eýrazııa Ulttyq ýnıversıteti bul jaǵdaıǵa qatysty muǵalimniń jazalanbaıtynyn habarlady.