Vıtse-mınıstr durys tamaqtanýdyń tártibi týraly aıtty
«2018 jyldan oqýshylardyń tamaqtaný ratsıony boıynsha eldegi mektepterdiń 53 paıyzyna biryńǵaı standart ázirlengen. Bıznes pen mektepterdiń ózara is-qımylyn, qoǵamdyq baqylaý júrgizýdi kózdeıtin mektep ashanalaryn jańǵyrtý jónindegi joba iske asyrylýda. Jalpy bilim beretin mektepterde tátti jáne gazdalǵan sýsyndardy satýǵa tyıym salynǵan. As tuzyn ıodtaý boıynsha, undy jáne basqa da birqatar azyq-túlikterdi mıneraldy-dárýmendik keshenmen baıytý boıynsha is-sharalar júrgizilýde», - deıdi vıtse-mınıstr balalardyń durys tamaqtanýy júıesine arnalǵan elordadaǵy sımpozıýmda.
Qamaljan Nadyrovtyń aıtýyna qaraǵanda, densaýlyq saqtaý salasyndaǵy bıznesti jetildirip, qoǵamdyq densaýlyqty bekemdeý maqsatynda tsıfrlyq tehnologııalardy biriktirý múmkindikteri qolǵa alynǵan. Mysaly, densaýlyqty, taǵamnyń jetkizilýin, sporttyq nysandardy, saýyqtyrý jáne fıtnes-ortalyqtardy baqylaıtyn mobıldik qosymshalar qyzmet etedi. Durys tamaqtanýdy yntalandyratyn jaǵdaı qurý úshin iri saýda sýpermarketterinde «Durys tamaqtanýǵa arnalǵan azyq-túlik» sóreleri uıymdastyrylýda.
«Búgin Qazaqstannyń densaýlyq saqtaý salasy qymbat turatyn statsıonarlyq emdeýden góri aýrýlardyń aldyn alýǵa, qoǵamdyq densaýlyqty basqarýdy kúsheıtý baǵytyna den qoıyp keledi. 2018 jylǵy medıtsınalyq-sanıtarııalyq alǵashqy kómek boıynsha elorda deklaratsııasy densaýlyqty profılaktıka arqyly saqtaýdy jáne nyǵaıtýdy basymdyq retinde jarııa etti. Bul qoǵamdyq densaýlyq saqtaý salasynyń negizgi fýnktsııalarynyń biri bolyp tabylady. 2019 jyldyń aqpanynda Memleket basshysy Qazaqstanda qoǵamdyq densaýlyq saqtaý jáne medıtsınalyq-sanıtarııalyq alǵashqy kómek qyzmetine ketetin shyǵystardy jalpy densaýlyq saqtaý salasyn qarjylandyrý kóleminen 40-tan 60 paıyzǵa deıin ulǵaıtýdy tapsyrdy. Zańnama jetildirilýde. Sáýir aıynyń sońyna deıin Úkimettiń qaraýyna durys tamaqtaný saıasatyn qalyptastyrý sharalary qarastyrylǵan «Halyq densaýlyǵy jáne densaýlyq saqtaý júıesi týraly» Kodeksiniń jańa redaktsııasy engiziletin bolady», - deıdi ol.
Vıtse-mınıstr óz sózinde qazirgi ýaqytta nan-toqash ónimderindegi tuz mólsherin azaıtý baǵytynda jumys júrgizilip jatqanyn atap ótti. Osyǵan baılanysty, óndirýshiler ónimderdegi tuz mólsherin azaıtý úderisine jumylǵan.
«1 keli unǵa nandaǵy tuz mólsherin 5 grammnan 2 grammǵa deıin azaıtý boıynsha kelisimge keldik. Osyndaı jumysty sút ónimderindegi qant mólsherin azaıtý maqsatynda júrgizý josparlanyp otyr», - deıdi Qamaljan Nadyrov.
Aıta ketsek, búgin elordada Qazaqstan, Ózbekstan, Tájikstan, Túrkimenstan, Qyrǵyzstan, Armenııa, Grýzııa jáne Ázerbaıjan Parlamenti depýtattarynyń, densaýlyq saqtaý, aýyl sharýashylyǵy, qarjy, bilim berý mınıstrlikteri ókilderi bas qosty. Sımpozıým barysynda balalarǵa arnalǵan durys tamaqtaný júıesin qamtamasyz etý jáne ony basqarýdy jaqsartý úshin ózara is-sharalar jaıly talqylap, olardy bekitetin bolady.
Atalǵan sharany Dúnıejúzilik BUU-nyń Azyq-túlik jáne aýylsharýashylyǵy uıymy men azyq-túlik baǵdarlamasynyń qoldaýymen QR Densaýlyq saqtaý mınıstrligi, Qoǵamdyq densaýlyq saqtaý ulttyq ortalyǵy, BUU Balalar qory (ıÝNISEF) uıymdastyryp otyr.