Vıtse-mınıstr bıyl astyq túsiminiń tómen ekendigin aıtty

NUR-SULTAN. QazAqparat – Elimizdegi dıqandar astyqty byltyrǵyǵa qaraǵanda bıyl 3 mln tonnaǵa az jınaýy múmkin. Buǵan jazdaǵy aptap ystyq sebep bolyp otyr, dep habarlaıdy QazAqparat tilshisi.

«Ótken jyly jınalǵan astyqtyń jalpy ónimi 20,3 mln tonnany quraǵan. Bıyl 17 mln tonna astyq jınaý josparlaýda. Elimizde 1 shildeden bastap aptap ystyq boldy. Ásirese, eń bıdaıly sanalatyn Qostanaı óńirindegi 8 aýdanda ekken egin kúıip ketti. Ol jerlerde qazirgi tańda gektaryna 3,4 tsentner astyq jınalyp jatyr. Osy sebepti, tómendeý bolady. Úkimet tarapynan kórsetiletin kómek-qoldaýlardyń barlyǵy kórsetildi. Problema joq. 1 shildeden keıin kún raıyna baılanysty qıyndyq týyndaǵannan keıin ǵana másele shyǵyp otyr», - dedi Aýyl sharýashylyǵy birinshi vıtse-mınıstri Aıdarbek Saparov OKQ-da ótken baspasóz máslıhatynda.

Vıtse-mınıstrge osy máselege baılanysty «elimizde nan baǵasy qymbattaı ma?» degen suraq qoıyldy. Aıdarbek Saparovtyń jaýabyna súıensek, bul másele boıynsha áli erterek birdeńe deý qıyn. Dese de, ol nan baǵasy sál qymbattaýy múmkin ekenin jasyrǵan joq.

«Eksportqa qansha mólsherde bıdaıdyń shyǵarylatynyn ázirge aıtý qıyndaý. Meniń oıymsha, eksportqa 6-7 mln tonna astyq shyǵaramyz dep boljam jasaýdamyz. 17 mln tonna jınasaq, báribir ótken jylǵydan qaraǵanda túsim azyraq bolady. Biraq ishki suranys tolyǵymen qanaǵattandyrylady», - dedi ol.