Vıtse-mınıstr: Birqatar anyqtamany joıýǵa bıznes áli daıyn emes

NUR-SULTAN. QazAqparat – Keıbir anyqtamalardy qoldanystan alyp tastaý boıynsha keshendi jospar ázirlenip jatyr. Bul týraly QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Abylaıhan Ospanov aıtty, dep habarlaıdy QazAqparat tilshisi.

«Bizdiń mınıstrdiń basshylyǵymen vedomstvoaralyq komıssııa qurylǵan bolatyn. Onda barlyq memlekettik organnyń, «Atameken» UKP, qoǵamdyq birlestikterdiń ókilderi enedi. Negizi mekenjaı anyqtamasy degen – joıylatyn qujattardyń alǵashqysy ǵana. Sebebi, ol eń kóp suralatyn anyqtama. Basqa anyqtamalardy da alyp tastaý boıynsha keshendi jospar ázirlenip jatyr. Qazirgi tańda memleket (memlekettik organdar- avt.) birqatar anyqtamany alyp tastaýǵa ázir. Biraq, olar bıznes úshin kerekti bolyp tur. Máselen, bankter nesıe bergen jaǵdaıda múliktiń nemese salyqtyń bary týraly anyqtamany talap etedi. Al túptep kelgende bankter ol qujattardy aqparattyq júıeden ala salýy kerek. ıAǵnı, bankterdiń aqparattyq júıege qoly jetkennen keıin biz birqatar anyqtamany joıamyz», - dedi Abylaıhan Ospanov Úkimettiń baspasóz ortalyǵyndaǵy brıfıngte.

Onyń aıtýynsha, qazirgi tańda Qazaqstanda 28 túrli anyqtama mekenjaı anyqtamasy sekildi elektrondy túrde beriledi.

«Aldymen ıntegratsııa jumystaryn aıaqtaý kerek. Jańa aıtyp ketkenimdeı, belgili bir azamattyń múlkiniń, salyǵynyń bolýy týraly anyqtamany búgin-aq biz joıýǵa daıynbyz. Biraq, bankter oǵan áli daıyn emes. Solardy kútip otyrmyz. Bankter bul málimetterdi ózderine ıntegratsııalaı alsa jetip jatyr», - dedi ol.

Eske sala ketsek, buǵan deıin «Azamattarǵa arnalǵan úkimet» memlekettik korporatsııasynyń basqarma tóraǵasy Ásemgúl Baltasheva elimizde mekenjaı anyqtamasy 1 qarashadan bastap joıylatynyn aıtqan edi.