Vıtse-mınıstr bilim salasyndaǵy ózekti baǵyttardy atady
NUR-SULTAN. QazAqparat - QR Bilim jáne ǵylym vıtse-mınıstri Fatıma Jaqypova búginde vedomstvo aldynda turǵan negizgi maqsattardy atady, dep habarlaıdy QazAqparat tilshisi.
«Birinshiden, «JOO-memleket-bıznes» formatynyń ózara is-qımylyn damytýǵa qatysty. Bul format Qazaqstan ekonomıkasynyń básekege qabilettigin arttyrýǵa negizdelgen. Osy arqyly biz qazaqstandyq joǵary mekteptiń eksporttyq áleýetin nyǵaıtýdy, shetel stýdentteri úshin JOO tartymdylyǵyn kóterýdi eńseremiz. Bul maqsatty sheshý kezinde barlyq resýrstardy jumyldyrý kerek, onyń ishinde memlekettik organdar da qamtylýy tıis. Sebebi qazaqstandyq bilim berý sapasy elimiz ekonomıkasynyń básekege qabilettigine tikeleı baılanysty. Osy oraıda bıznes-seriktesterdi tartý qajet. Bul turǵyda óńirler men olardyń basshylaryn bizdiń JOO-larǵa qoldaý kórsetýin suraımyn», - dedi F. Jaqypova elordadaǵy «Innovatsııalyq ekonomıka úshin kásipkerlik bilim» atty ІІІ halyqaralyq forýmynda.
Onyń sózine qaraǵanda, eńbek naryǵynda daıyndalǵan ári suranysqa ıe mamandar máselesi ózekti kúıinde qalyp otyr. Sońǵy kezderi bul taqyryp jıi talqylanyp keledi.
«Biz bıznes-qoǵamdastyqty osy máselede avangard bolýǵa shaqyramyz. Sizderdiń bastamalaryńyzben jańa bilim berý baǵdarlamalary ázirlenýi tıis», - dedi vıtse-mınıstr.
Munymen qosa ol JOO-larda qurylatyn tehnoparkter men bıznes-ınkýbatorlar nátıjege jumys isteýi tıis ekenin, osy salada rektorlar belsendi bolýy kerektigin atap ótti. Bul rette suranysqa ıe ǵylymı zertteýler júrgizilip, ekonomıkaǵa qajetti jańa tehnologııalardyń qurylýy mańyzdy.
Budan buryn habarlanǵandaı, elordada «Innovatsııalyq ekonomıka úshin kásipkerlik bilim» atty ІІІ halyqaralyq forým óz jumysyn bastady.
Forýmnyń maqsaty - kásipkerlik bilim berý salasynda oqytý men tájirıbe almasý úshin ashyq saraptamalyq pikirtalasqa aýdıtorııany tartý. Onda mamandar osy sektordaǵy bilim berý baǵdarlamalarynyń úzdik tájirıbeleri men trendteri týraly áńgimeleıdi.
