Vıtse-mınıstr bıatlonshylarmen kezdesti

ASTANA. QazAqparat - QR Mádenıet jáne sport vıtse-mınıstri Sáken Musaıbekov 2018 jylǵy qysqy Olımpıada oıyndaryna qatysýy yqtımal kandıdattarmen kezdesti, dep habarlaıdy QazAqparat.

QR Mádenıet jáne sport mınıstrligi Sport jáne dene shynyqtyrý isteri komıtetiniń baspasóz qyzmetinen habarlaǵandaı, kezdesý barysynda  bıatlonshylar  tórtjyldyqtyń basty dodasyna daıyndyqtary týraly aıtyp berdi. Óz kezeginde vıtse-mınıstr búgingi tańda komanda barlyq qajetti materıaldyq-tehnıkalyq quraldarmen jabdyqtalǵanyn, sonymen qatar qural-saımandardyń daıarlyǵyn tekserý úshin Germanııada jumys júrgizilgenin atap ótti.

Sóz sońynda vıtse-mınıstr bıatlonshylarǵa aldaǵy Álem kýbogi kezeńderinde joǵary deńgeıde óner kórsetýlerin jáne Olımpıadaǵa joldama alǵan sportshylarǵa sáttilik tilegen.

 

Esterińizge sala ketsek, qazaqstandyq bıatlonshylar búginde kóptegen halyqaralyq jarystarda joǵary deńgeıde óner kórsetýde. Atap aıtqanda, 28-shi Dúnıejúzilik qysqy ýnıversıadada sportshylarymyz 8 medal ıelense, onyń 3-eýi altyn, 3-eýi kúmis, 2-eýi qola medal. Sapporoda ótken Azııa oıyndarynda da otandyq sportshylar 12 medalǵa (6 altyn, 4 kúmis, 2 qola) qol jetkizdi.  Munan bólek, qazaqstandyq bıatlonshylar 2018 jyly ótetin qysqy olımpıadaǵa aldyn ala 10 lıtsenzııa jeńip aldy.  Ótken maýsymdaǵy Álem chempıonaty men Ult kýbogynda qazaqstandyq áıelder quramasy eń myqty 10 komandanyń quramyna ense, ulttyq qurama TOP-15-ke kirdi. Sondaı-aq bıatlonnan ulttyq komanda Olımpıadaǵy daıarlyqtaryn shyńdaý úshin 11 qarasha men 8 qańtar aralyǵynda Álem kýbogy men IBU kýboginiń kezeńine qatysady.

 

Aıta keteıik,  2018 jyldyń 9-25 aqpany aralyǵynda Koreıanyń Phenchhan qalasynda XXIII qysqy olımpıada oıyndary ótedi.