Vıtse-mınıstr beınesabaqtarda oryn alǵan qatelikter úshin keshirim surady

NUR-SULTAN. QazAqparat – Qashyqtan oqytý aıasynda túsirilgen beınesabaqtarda oryn alǵan qatelikter túzetildi. Bul týraly onlaın tártipte ótken baspasóz máslıhatynda QR Bilim jáne ǵylym vıtse-mınıstri Sholpan Karınova málim etti, dep habarlaıdy QazAqparat tilshisi.

Baspasóz máslıhatynda qashyqtan oqytý aıasynda telearnalardan kórsetiletin beınesabaqtarda qatelikter oryn alǵandyǵy týraly suraldy.

«Biz de osy qatelerdi kórip otyrmyz. Shynyn aıtý kerek, qashyqtan oqytýǵa muǵalimder de, mektepter de daıyn bolmady. Sonymen qatar, jańa format aıasynda muǵalimderdiń qobaljýy da kórindi. Eki aptanyń ishinde 700-den astam sabaq kórsetildi. Olardyń basym kópshiligi demalys kezinde túsirilgen edi. Sondyqtan jiberilgen qateler úshin qoǵamnan, ıaǵnı ata-analardan, balalardan keshirim suraımyz. 700-den astam beınesabaqtyń arasynda eki sabaqta qate ketkeni málim boldy», - dedi O. Karınova Ortalyq kommýnıkatsııalar qyzmetinde.

Vıtse-mınıstrdiń sózine qaraǵanda, atalǵan beınesabaqtar birden kórsetilimnen alynyp, keıin qaıta túsirildi.

«Barlyq televızııalyq sabaqtardyń qoljetimdi Youtube-kanaldaryna jańa beınesabaqtar ornalastyryldy. Ary qaraı tekserý jumystaryn kúsheıtip, mundaı qatelerdi boldyrmaýdyń barlyq sharalary iske asyrylýda», - dedi Sholpan Karınova.

Budan buryn habarlanǵandaı, QR Bilim jáne ǵylym vıtse-mınıstri Sholpan Karınova qashyqtan oqytý aıasynda ınternet platforma arqyly bilim alyp jatqan oqýshylar týraly aıtty.

Sonymen qatar, bıyl qashyqtan oqytýǵa qatysty jaǵdaı ózgermese, onda oqý jylynyń aıaqtalýyna arnalǵan sońǵy qońyraý soǵylmaýy múmkin.