Vıtse-mınıstr balasyna vaktsına saldyrmaı júrgen ata-analarǵa úndeý jasady
«Balalardyń densaýlyǵy ár ata-ananyń qolynda. Balalar jas bolǵandyqtan, ázirge óz densaýlyǵy úshin sheshim qabyldaı almaıdy. Olar úshin bul sheshimdi ata-ana qabyldaýy kerek. Balany emdete me, profılaktıkalyq shara ala ma – bári ata-ananyń qolynda. Qazir de osy ınfektsııanyń óte qaterli ekenin kórip otyrsyzdar. Ýaqytqa, mezgilge baılanysty kóptegen respıratorlyq vırýstyq ınfektsııalardyń kóp ekenin, al mıks sýperınfektsııanyń óte qatty asqynǵan túrde júretinin aıtqym keledi. Sondyqtan, memleket álemdegi eń jaqsy, barlyq klınıkalyq zertteýlerden ótken, eń tıimdi vaktsınany ákep otyrǵanda, bul múmkindikti paıdalanǵandaryńyz durys», - dedi dedi Ajar Ǵınııat tilshilerge bergen suhbatynda.
Vıtse-mınıstr qazaqstanda Pfizer vaktsınasynyń jetkilikti qory bar ekenin, eldegi barlyq bala sanyna jetkilikti vaktsına kelgenin aıtty.
«Árıne, balalar vaktsınatsııasy ata-ana sheshimine baılanysty bolǵandyqtan, ekpege túgel kelmeýi múmkin ekenin topshyladyq. Biraq, degenmen eldegi balalardyń barlyq sanyna jetetindeı doza jetkizildi. Endi ata-analarmen birge balalardyń densaýlyǵyn qamtamasyz etý úshin jumys isteımiz. Meniń búkil de otbasym, barlyǵymyz vaktsına alǵanbyz. Basqa da týǵan-týystarym men dostarymdy kezdesken saıyn vaktsınaǵa úgitteımin, alyp ta jatyr. Halyqtyń qazir kózi jetti, aýrýdyń qıyn ekenin, vaktsına almaǵan adamdarmen tolǵanyn kórdi, kóptegen jaqyndaryn joǵaltty. Vaktsınanyń kerek ekenin halyq túsindi dep oılaımyz», - dedi A. Ǵınııat.
Aıta keteıik, QR densaýlyq saqtaý vıtse-mınıstri Ajar Ǵınııat pen Sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova balalar vaktsınatsııasyn baqylaý úshin elordalyq №71 mektep-lıtseıge bardy.
Qazaqstanda 3300 bala Pfizer vaktsınasyn saldyrdy jáne eshqaısysynan qatty janama áser baıqalǵan joq.
Sonymen birge, Ajar Ǵınııat balalar vaktsınatsııasyn mektepte júrgizýge qatysty pikir bildirgen edi.
