Vıtse-mınıstr Astanadaǵy úılerdiń sapasyna qatysty pikir bildirdi
Onyń aıtýynsha, qurylysy júrgizilip jatqan úıdiń sapasyn tórt ınstantsııa - tapsyrys berýshi, merdiger, avtorlyq jáne tehnıkalyq baqylaý qyzmetteri qadaǵalaıdy. Sondaı-aq olar nysannyń bólinýinde de qol qoıady. Rásimder 2015 jyldan bastap jeńildetildi, memlekettik komıssııa degen joq. Tek nysandy qabyldaý qujatynda atalǵan tórt ınstantsııasynyń qoly bolady.
«Sapa jaǵynan sóz qozǵasaq, atalǵan tórt ınstantsııa qurylys jáne qoldanysqa berý ýaqytynda jaýapty bolady. Úı qurylysynyń sapasyn baqylaý týrasynda kóp jazylmasa da, olar naqty qalyptasqan ahýalǵa kóp áser ete almaıdy. Ótken jyly bizde 10,5 mıllıon sharshy metr baspana paıdalanýǵa berildi. Bul degenińiz kópqabatty jáne jeke úılerdiń bárin qosqanda - 89 myń páter», - dep naqtylady Roman Sklıar.
Sonymen qatar vıtse -mınıstr paıdalanýǵa berý kezeńinde úıdi salyp bergen kompanııa eki jyl boıy úıdiń sapasyna jaýap beretinin tilge tıek etti.
«Atalǵan jumysty baqylaýǵa mindettelgen jergilikti atqarýshy organdar júzege asyrady. Sondaı-aq úı paıdaǵa bergende turǵyn úı ınspektsııasy da jumyldyrylady. Bizde kóp jaǵdaıda Qazaqstanda óndirilgen qurylys materıaldary qoldanylady. Olardyń arzandyǵy nemse qymbattyǵy turǵyn úı klasyna baılanysty. Eger kompanııa birinshi nemese ekinshi klastaǵy úılerdi turǵyzsa, onda baspanalardy turǵyzýǵa jaqsartylǵan materıaldardy qoldanady. Al tórtinshi klastaǵy úıler laıyqty dárejede berýge bolatyndaı materıaldarmen salynady», - deıdi R.Sklıar.
Óz kezeginde Turǵyn úı jınaq bankiniń basqarma tóraǵasy Lázzát Ibragımova «Nurly jer» - keshendi baǵdarlama ekenin atap ótti.
«2005, 2007, 2008, 2010 jyldary qolǵa alynǵan baǵdarlamalardyń tájirıbesin zerttesek, Bank tarıhı turǵyda barlyq bastamalarǵa nesıe berýshi retinde qatysyp, 20 myńǵa jýyq qaryz bergen. Bizde birneshe jyldan keıin qaıta ózgertilip jatatyn úıler kezdesken joq. Memlekettik baǵdarlamar arqyly úı alǵan barlyq salymshylar óz ýaqytynda qaryzdaryn jaýyp, qarjylyq tártipti saqtap keledi», - dep túsindirdi Lázzát Ibragımova.
Onyń sózine súıensek, atalǵan baǵdarlama aımaqta jumys atqaryp jatqan qurylys materıaldaryn óndiretin kásiporyndardyń jumystaryna tyń serpin bergen.
«Biz qazirgi tańda jeke turǵyn úı qurylysy boıynsha bes aımaqpen memorandýmǵa qol qoıdyq. Oralda, Astanada jáne ózge de óńirlerde qurylys materıaldaryn óndiretin kásiporyndardyń ónimderi kóptep qoldanylyp keledi», - deıdi bank basshysy.
