Vıtse-mınıstr 30 jastan asqan stýdentter jaıynda: JOO-ǵa dıplom úshin barady

NUR-SULTAN. QazAqparat – 30 jastan asqan stýdentter joǵary oqý oryndaryna bilim alýǵa emes, dıplom úshin keledi. Mundaı pikirdi QR Bilim jáne ǵylym vıtse-mınıstri Mıras Dáýlenov aıtty, dep habarlaıdy QazAqparat tilshisi.

«Ótken jyly 30 myńnan astam stýdent bilim alyp jatqan bir joǵary oqý ornyn tekserdik. Onyń jabylatyndyǵy týraly jarııaladyq. Osy oraıda bizdiń sheshimimizge shaǵym túsirilip, sot otyrystary jarty jylǵa sozyldy. Bilim sapasynyń tómendigin jáne JOO-nyń jabylatynyn bile tura birde-bir stýdent basqa oqý ornyna aýystyrylmaǵan», - dedi M. Dáýlenov Ortalyq kommýnıkatsııalar qyzmetinde.

Onyń aıtýynsha, stýdentter kontıngentiniń jartysynan astamy 30 jastan asqan adamdardy qamtıtyn JOO-lar da bar.

«Bul stýdentterdiń bilim úshin emes, dıplom alýǵa kelgenin túsinip otyrmyz. 30 jastan asqan bul stýdentterde birinshi kýrstan bastap turaqty zeınetaqy aýdarymdary júrip jatqanyn atap ótken jón, ıaǵnı olar jumys istep júrgen adamdar. Nátıjesinde, biz qandaı mamandardy kóretinimiz belgili», - dedi Mıras Dáýlenov.

Onyń sózine qaraǵanda, tekseris barysynda atalǵan stýdetterdiń saabaqtarǵa barmaıtyndyǵy anyqtaldy. Pandemııa kezinde de olar qashyqtan oqytý rejımindegi sabaqtarǵa qatyspaýda.

«Іs júzinde bul stýdentter oqymaı júrgenin kórip otyrmyz. Atap aıtqanda, joǵary jastaǵy stýdentterdiń bilim alýyna eshqandaı shekteý joq, olar emin-erkin bilimin jalǵastyra alady. Olar bilim alýǵa nıet tanytsa, onda naqty sabaqtarda bolýy kerek», - dedi vıtse mınıstr.

Budan buryn habarlanǵandaı , QR BǴM Bilim jáne ǵylym salasyndaǵy baqylaý komıtetiniń tóraıymy Gúlzat Kóbenova keıbir joǵary oqý oryndarynda anyqtalǵan kemshilikterdi aıtty.