VI shaqyrylymdaǵy Almaty máslıhatynyń quramy 65%-ǵa jańardy
ALMATY. QazAqparat - Búgin VІ-shy shaqyrylymdaǵy Almaty qalasy máslıhatynyń 1-shi sessııasy ótip, onda depýtattar qala máslıhatynyń hatshysyn jáne turaqty komıssııalardyń tóraǵalaryn saılady.
Qala ákimdigi saıtynyń habarlaýynsha, shara barysynda jınalǵandar máslıhattyń hatshylyǵyna usynylǵan Qaldybaı Qazanbaevtyń kandıdatýrasyna biraýyzdan daýys berdi, ol ótken shaqyrylymda da osy laýazymdy atqarǵan bolatyn. Jalpy, VI-shy shaqyrylymdaǵy Almaty máslıhatynyń quramy 65%-ǵa jańardy.
Saılanǵan 37 kandıdattyń arasynda alǵash ret múmkindigi shekteýli jandar men repatrıanttar da bar. Olar - №33 saılaý ýchaskesinen «Shyraq» múgedek áıelder assotsıatsııasy» qoǵamdyq uıymynyń tóraıymy Lázzat Qaltaeva, №31 saılaý ýchaskesinen Farıda Merhamıtqyzy.
Halyq qalaýlylarynyń jasyna qaraı quramy da tolyq ózgerdi. Eger ótken shaqyrylymda 18-29 jas aralyǵyndaǵy jastar ókilderi joq bolsa, bıyl 2 jas depýtat (depýtattardyń jalpy sanynyń 5,4%-y) bar.Saılanǵan depýtattardyń ortasha jasy - 48.
Depýtattardyń jańarǵan quramyna túrli ulttar men dıasporlar ókilderi de engen. VI-shy shaqyrylymdaǵy máslıhat depýtattyǵyna orystar, kárister, tatarlar jáne uıǵyrlarmen birge 1 túrik jáne 1 qarashaı (barlyǵy 5,4%) saılanǵan.
Qala ákimi Baýyrjan Baıbek depýtattar jumysynyń óte mańyzdy, ásirese Elbasynyń bıýdjettik qarjyny tıimdi paıdalanýdaǵy, Úkimetpen birlesip «Ult josparyn» jáne «5 ınstıtýtsıonaldyq reformany» júzege asyrý úderisin zańnamalyq turǵydan qamtamasyz etýdegi, «Nurly jol» baǵdarlamasynyń iske asýyna baqylaýdy kúsheıtýdegi róliniń zor ekendigin atap ótti.
Ákim máslıhattyń alǵash ret 3 partııadan turatyndyǵyn atap ótti. Búgingi kúni máslıhatty «Nur Otan», «Aq jol», «Aýyl» partııalarynyń ókilderi quraıdy.
«Qalamyzdyń tarıhynda alǵash ret «Nur Otan» partııasy 70% -dan asa daýys jınady.Memleket basshysy «Nur Otanǵa» teńdessiz qoldaý kórsetilgendigin, sondyqtan osynaý joǵary senimdi aqtaý qajettigin erekshe atap ótti. Sonymen qatar ol demokratııalyq kúshterdiń Jalpyulttyq Koalıtsııasyn odan ári damytýǵa erekshe nazar aýdardy. Prezıdenttiń tapsyrmasyna sáıkes biz qalamyzdaǵy jáne máslıhattaǵy barlyq partııalardyń ózderiniń elektorattaryn usyna otyryp, elimizdiń ıgiligi, birlik pen turaqtylyq jolynda jumys isteýi úshin demokartııalyq kúshterdiń qalalyq koalıtsııasynyń jumysyn kúsheıtýge tıispiz. Biz qalanyń jáne qala turǵyndarynyń múddesi úshin barlyq partııalardyń usynys- pikirlerin eskerýimiz qajet», - dedi qala ákimi.
Atalǵan mindetterdi júzege asyrý, máslıhattyń jumys tıimdiligin arttyrý maqsatynda alty turaqty komıssııalar quryldy. Ekonomıka jáne bıýdjet jónindegi turaqty komıssııanyń tóraǵalyǵyna Sergeı Kozlov, kólik pen turǵyn úı saıasatyn damytý jónindegi turaqty komıssııanyń tóraıymy bolyp Roza Badaeva, qurylys jáne jer qatynastary jónindegi turaqty komıssııanyń tóraǵalyǵyna Murat Ádilhanov, kásipkerlik pen turǵyn úı- kommýnaldyq sharýashylyqty damytý jónindegi turaqty komıssııanyń tóraǵalyǵyna Konstantın Avershın, áleýmettik- mádenı damý jónindegi turaqty komıssııanyń tóraıymy bolyp Hanzada Esenova, jergilikti memlekettik basqarý men zańdylyq jónindegi turaqty komıssııanyń tóraıymy bolyp Dınar Núketaeva saılandy.
