VI Kóshpendiler oıyndaryndaǵy medal esebi: Qazaqstan ne deıdi?
ASTANA. KAZINFORM – VI Dúnıejúzilik kóshpendiler oıyndarynyń qorytyndysy boıynsha Qazaqstan 32 altyn, 20 kúmis jáne 22 qola medal alǵanyn habarlady. Alaıda Qyrǵyzstan tarapy oıyndarda resmı medaldyq jáne jalpykomandalyq esep júrgizilmegenin málimdedi. Qazaqstannyń medal esebi qalaı jasaldy? Bul máselege QR Týrızm jáne sport mınıstrliginiń resmı ókili Meıramǵazy Saparǵalıev Jibek Joly telearnasynyń «Búgin.LIVE» baǵdarlamasynda jaýap berdi.
Eske sala keteıik, Qyrǵyzstannyń Mádenıet, aqparat, sport jáne jastar saıasaty mınıstrligi VI Dúnıejúzilik kóshpendiler oıyndary qorytyndysynda memleketter arasynda jalpy medal reıtıngi jasalmaıtynyn málimdedi.
Buǵan deıin World Nomad Games 2026 oıyndarynyń resmı Instagram paraqshasynda Qyrǵyzstan 30 altynmen birinshi, Qazaqstan 20 altynmen ekinshi kórsetilgen medal esebi jarııalanǵan bolatyn. Alaıda keıin bul jazba áleýmettik jeliden óshirildi.
Meıramǵazy Saparǵalıevtiń aıtýynsha, Kóshpendiler oıyndarynyń basty maqsaty – elderdi medal úshin jarystyrý emes, etnosportty damytý jáne halyqtar arasyndaǵy mádenı baılanysty nyǵaıtý.
– Dúnıejúzilik kóshpendiler oıyny kóshpendilerdiń rýhyn sezindiretin, dástúri men mádenıetin ushtastyratyn úlken alańǵa aınaldy. Munda tek túrkitildes halyqtar ǵana emes, muhıt asyp kelgen kóptegen sportshy qatysty. Olardyń elderinde de kóshpendiler dáýirinen saqtalǵan muralar bar. Olar óz dástúrlerin bizdiń oıyndarmen ushtastyryp, ortaq baılanystardy seziný baǵytynda qatysyp jatyr, – dedi ol.
Onyń aıtýynsha, Kóshpendiler oıyndarynyń geografııasy da jyl sanap keńeıip keledi. Bıylǵy dodaǵa 113 elden 3 myńǵa jýyq sportshy qatysty.
Mınıstrlik ókili medal esebine qatysty Qazaqstannyń derekteri qalaı qalyptasqanyn da túsindirdi. Onyń aıtýynsha, Qazaqstan quramasynyń qorjynynda 32 altyn medal bar jáne olardyń barlyǵy jarystardyń qorytyndysy boıynsha tirkelip, marapattaý rásiminen ótken.
– Dostyq jeńdi desek bolady. Baýyrlas el bolǵannan keıin árqaısysynyń óz orny bar, ár medaldiń ózindik máni bar. Biraq bizdiń naqty esebimiz boıynsha 32 altynnyń bary belgili boldy. Onyń barlyǵyn áleýmettik jelilerde, mınıstrliktiń resmı saıtynda jarııalap, nasıhattadyq. Sondyqtan 32 altynnyń bary anyq. Onyń ishinde bir ǵana altyn – top báıgedegi júlde – esepke alynǵan joq. Sebebi ol qoıylymdyq jarys boldy. Al medaldyq esepke kiretin 32 altyn tolyq naqtylandy, – dedi Meıramǵazy Saparǵalıev.
Ol Qazaqstan sportshylarynyń júldeleri resmı marapattaý rásimderi arqyly bekitilgenin atap ótti.
– 32 altynnyń barlyǵy tuǵyrda marapattaldy, sportshylardyń moınyna altyn medal taǵyldy. Keıin qyrǵyz tarapy «bul dostyq oıyny bolsyn, bir-birimizben altyn úshin jaryspaıyq, dostyqpen syılasaıyq» degen iltıpat bildirdi. Biz de muny eki el arasyndaǵy, sportshylar arasyndaǵy tatýlyq pen bereke-birlikti arttyrýǵa baǵyttalǵan úlken ıgi shara dep baǵaladyq, – dedi mınıstrlik ókili.
Onyń pikirinshe, Qazaqstan quramasy Kóshpendiler oıyndaryna qoıǵan negizgi maqsatyna jetti. El namysyn qorǵaǵan shamamen 170 sportshynyń jartysyna jýyǵy júldemen oralǵan.
