VI Dúnıejúzilik kóshpendiler oıyny: úshinshi kúnniń nátıjesi qandaı
ASTANA. KAZINFORM - Álemniń 113 elinen 3000 sportshy qatysyp jatqan VI Dúnıejúzilik kóshpendiler oıyndarynyń dodasy tartysty oıyndarmen, jarqyn jeńistermen, jańa rekordtarmen tolyǵa tústi. Qazaqstan quramasy oıyndardyń úshinshi kúninde 12 altyn, 7 kúmis, 5 qola medal jeńip aldy.
QR Sport komıtetiniń málimetterine qaraǵanda, aýdaryspaqtan (er eńısh) 100 keli salmaqta el namysyn qorǵaǵan álem chempıony, osy oıyndardyń eki dúrkin jeńimpazy Іzbasarov Syrym baıyrǵy qyrǵyzstandyq qarsylasyn aıqyn basymdyqpen jeńip, úshinshi ret jeńis tuǵyryna kóterildi. Aýdaryspaqtyń altyn salmaǵy 90 kelide el úmitin aqtaǵan Ótkelbaı Daryn qarsylastarynyń barlyǵyn aıqyn basymdyqpen jeńip, altyn júlde ıegeri atandy. Asa aýyr salmaqta jarys jolyna shyqqan Erkinuly Nurjan qola júldeni qanaǵat tutty.
Qusbegilikten (kýsh salýý, dalba, býrkýt) el quramasy sapynda 9 sportshy kelgen bolatyn, sonyń tórteýi jeńis tuǵyryna kóterildi. Atap aıtqanda, «qarshyǵa» boıynsha Jalǵasuly Serikbolsyn «Jebe» degen qusymen altyn, «búrkit» boıynsha Qoshqarov Arman «Alǵyr» atty qyranymen kúmis, «ıtelgi» boıynsha Babajan Baqdáýlet «Ushqyr» atty qusymen kúmis, «ıtelgi» boıynsha Kenjetaev Erlan «Aqbalyq» atty qusymen qola medal aldy.
Oıyndar baǵdarlamasyna kóshpendi elderdiń 14 túrli kúresi ense, jarystyń úshinshi kúninde otandastarymyz sambo men qyrǵyz kúresinen (kyrgyz kýrósh) óner kórsetti.
Sambodan Sapar Bolat (+98 keli) altyn, Nyǵmetov Erkebulan (79 keli) men Beısenbaev Jandos (64 keli) qola júldege ıe boldy. Qyrǵyz kúresinen aýyr salmaqtaǵy balýanymyz Jumaǵalı Almas (+100) aqtyq synda qyrǵyz eliniń sportshysyna ese jiberdi. Jankúıerlerdiń erekshe yqylasyna ıe bolǵan arqan tartystan (arkan tartysh) qurama músheleri búgin de altyn júlde oljalady. Keshe sportshylarymyz «8x8» baǵdarlamasy boıynsha aqtyq synda qyrǵyz elinen basym túsip, altyn alsa, búgin «4x4» baǵdarlamasynyń aqtyq synynda ırandyq sportshylardy jeńdi.
Sondaı-aq, qol kúresten (armrestlıng) ulttyq qurama músheleri 7 altyn, 4 kúmis, 1 qola alyp, medaldar qorjynyn toltyrdy. Bilek kúshin altynǵa aıyrbastaǵan sportshylar: Aıdarhan Nurdáýlet (-90, oń qol, sol qol), Quttymuratov Medet (+90, oń qol, sol qol), Ýstınov Danıl (-80, sol qol), Sydykjan Malena (+65 keli, oń qol, sol qol) (oń qoldan bólek, sol qoldan bólek medal jıyntyǵy bar).
Erteń, 4 qyrkúıekte, sportshylarymyz 21 sport túrinen jarys jolyna shyǵady: kókpar, kókbóri, alaman báıge, qunan báıge, jorǵa, ushqyr báıge, dónen báıge, qazaq kúresi, gıýlesh, gýshtını mıllı gamarbandı, hapsaǵaı, ovarı, mangala, toǵyzqumalaq, at marafony, ordo, jamby atý, dástúrli sadaq atý, arqan tartys, strongmen, tazy jarysy boıynsha jarystar ótedi.
Osyǵan deıin qazaqstandyq sportshylardyń Dúnıejúzilik kóshpendiler oıynynda ordo saıysyna qatysyp jatqany týraly jazdyq.
