VI Dúnıejúzilik kóshpendiler oıyndarynyń saltanatty formasyna konkýrs jarııalandy

ASTANA. KAZINFORM — VI Dúnıejúzilik kóshpendiler oıyndarynyń ashylý saltanatyna qatysýshylarǵa arnalǵan saltanatty kıim úlgisin anyqtaý maqsatynda konkýrs jarııalandy. Bul týraly Qyrǵyz Respýblıkasynyń Dene shynyqtyrý jáne sport jónindegi memlekettik agenttigi habarlady, dep jazady Kabar.

Konkýrstyń maqsaty – ulttyq naqyshtaǵy órnekterdi zamanaýı dızaınmen úılestire otyryp, estetıkalyq, yńǵaıly ári resmı is-shara talaptaryna saı keletin saltanatty ekıpırovka ázirleý. Kıim úlgileri VI Dúnıejúzilik kóshpendiler oıyndarynyń bekitilgen brend-býkine sáıkes bolýy tıis.

Konkýrsty Ulttyq sport túrleri dırektsııasy Qyrǵyz Respýblıkasynyń Dene shynyqtyrý jáne sport jónindegi memlekettik agenttiginiń qoldaýymen ótkizedi.

Ekıpırovkaǵa qoıylatyn talaptar

Saltanatty forma quramyna bas kıim, syrt kıim, erlerge arnalǵan shalbar, al áıelderge ulttyq stıldegi kóılek, sondaı-aq Dúnıejúzilik kóshpendiler oıyndarynyń resmı atrıbýtıkasy mindetti túrde enýi kerek. Kıim sportshylarǵa, jattyqtyrýshylarǵa jáne tóreshilerge arnalǵan.

Barlyq jumys zamanaýı estetıka talaptaryna saı, yńǵaıly ári qaýipsiz bolýy tıis. Eskızder materıaldar shyǵyny men bir jıyntyqtyń qunyn esepteýmen birge usynylady. Qatysýshylar usynylǵan dızaınnyń avtory bolýy qajet. Jumystar elektrondy formatta, qaǵaz nusqada jáne daıyn úlgi (materıalda tigilgen model) retinde qabyldanady.

Kıim tigýde tabıǵı matalardy (maqta, jún, zyǵyr, jibek) paıdalaný usynylady. Tigisterdiń sapasy, fýrnıtýranyń myqtylyǵy, túster úılesimi, ulttyq kolorıt pen kóshpendiler oıyndarynyń sımvolıkasynyń bolýy basty talaptardyń biri sanalady.

Konkýrstyń ótkizý tártibi

Ótinimder 2026 jylǵy 10 aqpanǵa deıin qabyldanady. Baıqaý eki kezeńde ótedi:

• Іrikteý kezeńi – eskızder men sıpattamalar boıynsha;

• Qorytyndy kezeń – daıyn erler jáne áıelder kıim úlgilerin usyný.

Qorytyndy kezeńde komıssııa jumystardy belgilengen krıterııler boıynsha baǵalaıdy.

Baǵalaý krıterııleri

• ıdeıanyń biregeıligi men dızaın;

• taqyrypqa jáne qoıylǵan talaptarǵa sáıkestigi;

• oryndaý sapasy men materıaldardyń deńgeıi;

• estetıkalyq tutastyq.

Jeńimpazdardy marapattaý

Konkýrs jeńimpazdary sertıfıkattarmen jáne aqshalaı syılyqtarmen marapattalady.

І oryn – 200 000 som.

Úzdik jumystar resmı is-sharalarda qoldanýǵa usynylýy múmkin. Úzdik úlgilerge avtorlyq quqyq Ulttyq sport túrleri dırektsııasynyń qaramaǵyna ótedi jáne olardyń kelisiminsiz paıdalanylmaıdy.

Budan buryn Dúnıejúzilik kóshpendiler oıynyna daıyndyqtyń alǵashqy jospary bekitildi.