VI Dúnıejúzilik kóshpendiler oıyndaryna 3 myńǵa jýyq sportshy qatysady
ASTANA.KAZINFORM — VI Dúnıejúzilik kóshpendiler oıyndaryna álemniń 112 elinen sportshylar qatysýǵa ótinim berdi. Bul týraly Qyrǵyzstan astanasy Bishkektegi Kazinform agenttiginiń menshikti tilshisi habarlady.
Uıymdastyrý komıtetiniń málimetinshe, bıylǵy Dúnıejúzilik kóshpendiler oıyndaryna 3 myńǵa jýyq sportshy qatysady.
Sportshylardyń jeke málimetteri Oıyndardyń resmı saıtyndaǵy elektrondy akkredıtteý júıesi arqyly VI Dúnıejúzilik kóshpendiler oıyndarynyń sporttyq baǵdarlamasyn ótkizý týraly erejeniń talaptaryna sáıkes qabyldanǵan.
Qatysýǵa ótinim Avstralııa, Ázerbaıjan, Armenııa, Argentına, Bangladesh, Bahreın, Grýzııa, Úndistan, Indonezııa, Iran, Ispanııa, Qazaqstan, Mońǵolııa, Polsha, Reseı, AQSh, Ózbekstan jáne basqa da memleketterden túsken. Aıta keteıik, uıymdastyrý komıteti bastapqyda 100 elge resmı shaqyrtý jibergen.
VI Dúnıejúzilik kóshpendiler oıyndarynyń erejesine sáıkes, jarys baǵdarlamasyna sporttyń 42 túri engizilgen.
31 tamyzda sporttyq delegatsııalar VI Dúnıejúzilik kóshpendiler oıyndarynyń saltanatty ashylý rásimi aıasynda elder sherýine qatysady. Komandalar bul sharaǵa biryńǵaı ulttyq kıimmen shyǵýy tıis.
Eske salaıyq, 31 tamyzda Bishkektegi jańa stadıonda VI Dúnıejúzilik kóshpendiler oıyndarynyń aýqymdy ashylý saltanaty ótedi.
Al Oıyndardyń negizgi sporttyq, mádenı jáne ǵylymı baǵdarlamasy 2-6 qyrkúıek aralyǵynda Ystyqkól oblysynyń Cholpon-Ata qalasy men Qyrchyn shatqalynda jalǵasady.
Buǵan deıin Qyrǵyzstan VI Dúnıejúzilik kóshpendiler oıyndaryna arnalǵan beınerolıkti tanystyrǵan bolatyn.
Sondaı-aq 2026 jylǵy Dúnıejúzilik kóshpendiler oıyndarynyń talısmany retinde ilbis tańdalǵany habarlanǵan edi. Oǵan Bataı degen esim berildi.
Mamyr aıynda Bishkekte Oıyndardyń bastalýyna 100 kún qalǵanyn kórsetetin elektrondy keri sanaq taqtasy resmı túrde iske qosyldy.
Qyrǵyzstanda Dúnıejúzilik kóshpendiler oıyndarynyń rýhanı jáne úılestirýshi ortalyǵy mártebesin elge zań júzinde bekitý usynylyp otyr.
Qyrǵyzstannyń Dene shynyqtyrý jáne sport jónindegi memlekettik agenttiginiń málimetinshe, VI Dúnıejúzilik kóshpendiler oıyndarynda kók bóri men kókpar jarystary jeke-jeke sporttyq dıstsıplına retinde ótkiziledi.
